ក្រុមឧទាមហ៊ូទី (Houthi) របស់ប្រទេសយេមែនបាននិយាយកាលពីថ្ងៃចន្ទថា ខ្លួនបានបើកការវាយប្រហារដោយដ្រូនរួមគ្នាជាមួយក្រុមតស៊ូអ៊ីស្លាមនៅអ៊ីរ៉ាក់ (IRI) ប្រឆាំងនឹង គោលដៅសំខាន់នៅក្នុងទីក្រុង Eilat នៃប្រទេសអ៊ីស្រាអែល នេះយោងតាមទីភ្នាក់ងារសារព័ត៌មានស៊ីនហួ (Xinhua News Agency) របស់ប្រទេសចិន ដែលបានចុះផ្សាយនៅ ព្រឹកថ្ងៃអង្គារ ទី០៩ ខែកក្កដា ឆ្នាំ២០២៤ នេះ។
អ្នកនាំពាក្យយោធាក្រុមឧទាមហ៊ូទី លោក Yahya Sarea បាននិយាយនៅក្នុងសេចក្តីថ្លែងការណ៍មួយ ដែលបានផ្សាយដោយទូរទស្សន៍ Al-Masirah ដែលគាំទ្រដោយក្រុមឧទាមហ៊ូទីថា ការវាយប្រហារបានវាយប្រហារចំគោលដៅយ៉ាងត្រឹមត្រូវ។
លោកបាននិយាយបន្ថែមទៀតថា យើងនឹងបន្តធ្វើប្រតិបត្តិការជាមួយក្រុមតស៊ូអ៊ីស្លាមអ៊ីរ៉ាក់ ដើម្បីគាំទ្រប្រជាជនប៉ាឡេស្ទីន រហូតដល់ការឈ្លានពានរបស់អ៊ីស្រាអែលបញ្ឈប់ ហើយការឡោមព័ទ្ធលើតំបន់ហ្គាហ្សាត្រូវបានដកចេញ។
ក្រុមសកម្មប្រយុទ្ធអ៊ីរ៉ាក់ ក៏បានបញ្ជាក់ពីការវាយប្រហាររួមគ្នា នៅក្នុងសេចក្តីថ្លែងការណ៍មួយកាលពីយប់ថ្ងៃចន្ទ។
មិនមានការអត្ថាធិប្បាយណាមួយភ្លាមៗពីភាគីអ៊ីស្រាអែលណៅឡើយនោះទេ។
ក្រុមឧទាមហ៊ូទី ដែលគ្រប់គ្រងភាគច្រើននៃភាគខាងជើងប្រទេសយេមែន បានចាប់ផ្តើមកាលពីខែវិច្ឆិកាឆ្នាំមុន ដើម្បីបាញ់មីស៊ីលផ្លោងប្រឆាំងនាវា និង ដ្រូន សំដៅលើអ្វីដែលពួកគេបាននិយាយថា នាវាដែលមានទំនាក់ទំនងនឹងអ៊ីស្រាអែលឆ្លងកាត់សមុទ្រក្រហម ដើម្បីបង្ហាញពីសាមគ្គីភាពជាមួយប៉ាឡេស្ទីននៅក្នុងតំបន់ ហ្គាហ្សា ស្ទ្រីប។ ថ្មីៗនេះ ក្រុមនេះបានពង្រីកការវាយប្រហាររបស់ខ្លួន រួមបញ្ចូលទីក្រុង Eilat នៃប្រទេសអ៊ីស្រាអែលផង។
ជាការឆ្លើយតប សម្ព័ន្ធកងទ័ពជើងទឹកអាមេរិក-អង់គ្លេស ដែលឈរជើងក្នុងដែនទឹក ចាប់តាំងពីខែមករា បានធ្វើការវាយឆ្មក់តាមអាកាស និង ការវាយប្រហារដោយមីស៊ីលប្រឆាំងនឹងគោលដៅក្រុមឧទាមហ៊ូទី ដែលនាំទៅដល់ការពង្រីកការវាយប្រហាររបស់ក្រុមឧទាមហ៊ូទី រួមបញ្ចូលទាំងនាវាពាណិជ្ជកម្មអាមេរិក និង អង់គ្លេស និង នាវាកងទ័ពជើងទឹកផងដែរ៕
