កាលពីវេលាម៉ោងប្រមាណម៉ោង៤:២០នាទីទាបភ្លឺ ថ្ងៃអង្គារ ១០រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃអង្គារ ទី០៥ ខែមីនា ឆ្នាំ២០២៤ ម្សិលមិញនេះ ខ្យូសនៅក្នុងភោជនីយដ្ឋានមួយកន្លែង ត្រូវបានភ្លើងឆាបឆេះ និង រីករាលដាលដល់ខ្យូសក្នុងហាងមួយកន្លែងផ្សេងទៀត បង្កឲ្យមានការភ្ញាក់ផ្អើល ដែលមានទីតាំងស្ថិតនៅត្រង់ចំណុចភោជនីយដ្ឋាន បឹងកសាន្ត និង បឹងឫស្សី សង្កាត់ព្រៃស ខណ្ឌដង្កោ រាជធានីភ្នំពេញ។
ប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ ហាងខាងលើនេះបានបិទទ្វារឈប់លក់រាល់ដង បុគ្គលិកទាំងអស់បានចូលដេក។ បន្ទាប់មកក៏ស្រាប់តែមានភ្លើងមួយឆេះឡើងចេញពីខ្យូសប្រក់ស្បូវ យីហោឈ្មោះ បឹងកម្សាន្ត និង ឆេះរីករាលដាលដល់ហាងមួយកន្លែងផ្សេងទៀត ដែលមានយីហោឈ្មោះ បឹងឫស្សី យ៉ាងសន្ធោសន្ធៅតែម្ដង។ ចំណែកឯបុគ្គលិកវិញមិនដឹងថា មានបញ្ហាអ្វីកើតឡើងនោះទេ ដោយសារតែពួកគាត់ដេកលង់លក់ក្នុងដំណេកដូចគ្នា។ ក្នុងពេលភ្លើងកំពុងតែឆេះ ប្រជាពលរដ្ឋដែលត្រូវជាអ្នកជិតខាងនឹងគ្នា បាននាំគ្នាស្រែកផ្អើលឆោឡោថា មានភ្លើងឆេះៗ ទើបផ្អើលអ្នកដល់នៅក្នុងហាង ហើយបាននាំគ្នាយកទឹកទៅជះពន្លត់អគ្គិភ័យ និង ជះទឹកទប់ស្កាត់ភ្លើង ដើម្បីកុំឱ្យភ្លើងឆ្លងទៅដល់ខ្យូសដទៃទៀត។ ពួកមិនដឹងថា ត្រូវរាយការណ៍ទៅខាងណាទាន់នោះទេ បានត្រឹមតែនាំគ្នាជួយពន្លត់ភ្លើងម្នាក់មួយដៃមួយជើងតែប៉ុណ្ណោះ។ ភ្លើងបានរលត់ទៅវិញនៅវេលាម៉ោង៥ព្រឹកក្នុងថ្ងៃដដែល។
ករណីភ្លើងឆេះខ្យូសខាងលើនេះ មិនឃើញមានវត្តមានសមត្ថកិច្ចមូលដ្ឋាន ឬ ជំនាញណា ធ្វើអន្តរគមន៍នោះទេ ហើយភ្លើងក៏មិនបណ្តាលឲ្យមនុស្សណាម្នាក់ ទទួលរងនូវគ្រោះថ្នាក់ដែរ គ្រាន់តែរងការខូចខាតខ្យូសចំនួនប្រហែល៧ក្នុងហាង២ជាប់គ្នាតែប៉ុណ្ណោះ។ ចំណែកឯមូលហេតុនៃការឆេះនេះវិញ ត្រូវបានប្រជាពលរដ្ឋដាក់ការសង្ស័យថា ឆ្លងចរន្តអគ្គិសនី៕
