កាលពីថ្ងៃចន្ទ ៩រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃចន្ទ ទី០៤ ខែមីនា ឆ្នាំ២០២៤ ម្សិលមិញនេះ កម្លាំងនៃអធិការដ្ឋាននគរបាលក្រុង-ស្រុកទាំង១២ បន្តចុះធ្វើការផ្សព្វផ្សាយអំពីគោលនយោបាយ ភូមិ-ឃុំ-សង្កាត់ មានសុវត្ថិភាព ដើម្បីបង្ការ ក៏ដូចជាកាត់បន្ថយបទល្មើសតាមមូលដ្ឋានក្នុងខេត្តសៀមរាប។
ប្រតិបត្តិការនេះធ្វើឡើងដោយអនុវត្តតាមការណែនាំរបស់ លោកឧត្តមសេនីយ៍ទោ តេង ច័ន្ទណាត ស្នងការ នៃស្នងការដ្ឋាននគរបាលខេត្តសៀមរាប។ នៅក្នុងនោះផងដែរ កម្លាំងនៃអធិការដ្ឋាននគរបាលក្រុង-ស្រុកទាំង១២ ក៏បានធ្វើការផ្សព្វផ្សាយអំពីផលប៉ះពាល់នៃគ្រឿងញៀន,បារីអេឡិចត្រូនិច និង ច្បាប់ស្តីពីចរាចរណ៍ផ្លូវគោក ជូនដល់ប្រជាពលរដ្ឋ និង សិស្សានុសិស្សនៅតាមសាលារៀន និង បានចុះបំពេញបែបបទ ផ្តល់អត្តសញ្ញាណប័ណ្ណសញ្ជាតិខ្មែរជូនដល់ប្រជាពលរដ្ឋដែលទើបគ្រប់អាយុ ឬ ផុតសុពលភាពប្រើប្រាស់ ព្រមទាំងបានប្រគល់ជូនសៀវភៅគ្រួសារ សៀវភៅស្នាក់នៅ និងអត្តសញ្ញាណប័ណ្ណសញ្ជាតិខ្មែរ ជូនដល់ប្រជាពលរដ្ឋនៅតាមមូលដ្ឋានផងដែរ៕
