
មានអគ្គិភ័យមួយបានកើតឡើង បណ្តាលឲ្យផ្ទះរបស់ប្រជាពលរដ្ឋចំនួន១ខ្នង រងការខូចខាតទាំងស្រុង ដោយសារឆ្លងចរន្តអគ្គិសនី នៅពេលបញ្ឆេះម៉ាស៊ីនបូមទឹកដាក់អាង។
ហេតុការណ៍គ្រោះអគ្គិភ័យខាងលើនេះ បានកើតឡើងពីម៉ោង២:១០នាទីរសៀល ថ្ងៃសៅរ៍ ៥កើត ខែចេត្រ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃសៅរ៍ ទី១៣ ខែមេសា ឆ្នាំ២០២៤ ម្សិលមិញនេះ ដែលមានទីតាំងស្ថិតនៅ មុខសិប្បកម្មកែច្នៃឬស្សី ភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី។
លោកអធិការនគរបាលស្រុកកោះញែកបានឲ្យដឹងថា ផ្ទះរបស់ប្រជាពលរដ្ឋ ដែលត្រូវអគ្គិភ័យឆាបឆេះខាងលើនេះ មានម្ចាស់ឈ្មោះ អ៊ាង ស្រីធា ភេទស្រី អាយុ៤៥ឆ្នាំ សញ្ជាតិខ្មែរ ជនជាតិខ្មែរ មុខរបរកសិករ រស់នៅ ភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី។ សម្ភារៈដែលរងការខូចខាត ដោសារអគ្គិភ័យនេះ រួមមាន៖ ផ្ទះចំនួន១ខ្នង ទំហំ ៦ម៉ែត្រ × ៩ម៉ែត្រ សាងសង់ពីឈើ ប្រក់ស័ង្កសី, ប្លង់ដីចំនួន១សន្លឹក, អត្តសញ្ញាណប័ណ្ណចំនួន២សន្លឹក, សៀវភៅគ្រួសារ, សៀវភៅស្នាក់នៅ, គ្រែដេកចំនួន៥គ្រឿង, តុបាយចំនួន១, លុយចំនួន ២,៥០០,០០០៛, ខ្សែកផ្លាក់ទីនចំនួន៥ជី, ខ្សែដៃផ្លាកទីនតម្លៃ៨០០,០០០៛, ម៉ូទ័រចំនួន៥គ្រឿង, ឈើសម្រាប់ទុកធ្វើគ្រែចំនួន ១០សន្លឹក, ពាងទឹកចំនួន៣ពាង, បន្ទប់ទឹក ទំហំ ៣×៣ម៉ែត្រ និង សម្ភារៈប្រើប្រាស់ ចាន ឆ្នាំង ភួយ ម៉ុង កន្ទេល ខោអាវ និង សម្ភារៈមួយចំនួនទៀត។ មូលហេតុនៃអគ្គិភ័យខាងលើនេះ គឺបណ្តាលមកពីឆ្លងចរន្តខ្សែភ្លើងពេលបញ្ឆេះម៉ាស៊ីនភ្លើងបូមទឹកដាក់អាង។
នៅក្នុងហេតុការណ៍គ្រោះអគ្គិភ័យខាងលើនេះ កម្លាំងសមត្ថកិច្ចប្រើប្រាស់រថយន្តអគ្គិភ័យ ដោយប្រើទឹកអស់ចំនួន៥រថយន្ត ទើបពន្លត់អគ្គិភ័យនេះ ឲ្យរលត់ទាំងស្រុង៕

