កម្លាំងនគរបាលខេត្ដព្រះសីហនុ បានបើកប្រតិបត្ដិការឆ្មក់ចូលបង្ក្រាបទីតាំងខារ៉ាអូខេមួយកន្លែង ដែលមានយីហោឈ្មោះ ជីនឌានហ្ស៊ីយី ពាក់ព័ន្ធនឹងករណី ជួញដូរ រក្សាទុក សម្រួលឲ្យប្រើប្រាស់ និង កែច្នៃដោយខុសច្បាប់នូវសារធាតុញៀន ដោយបានឃាត់មនុស្សចំនួន៨៧នាក់ ស្រី៤៣នាក់ និង ដកហូតនូវសារធាតុញៀន ព្រមទាំងវត្ថុតាងមួយចំនួន ដែលមានទីតាំងស្ថិតនៅ ក្រុម២ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ក្រោមការបញ្ជាផ្ទាល់ពីឧត្ដមសេនីយ៍ឯក ស រដ្ឋា អគ្គស្នងការរង និង ជាស្នងការនគរបាលខេត្ដព្រះសីហនុ ព្រមទាំងមានការសម្របសម្រួលពីតំណាងអយ្យការអមសាលាដំបូងខេត្ដព្រះសីហនុ។
យោងតាមរបាយការណ៍របស់ស្នងការនគរបាលខេត្ដព្រះសីហនុបានឲ្យដឹងថា កាលវេលាម៉ោង១:៤៥នាទីរំលងអាធ្រាត្រ ឈានចូលដល់ថ្ងៃពុធ ១១រោច ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃពុធ ទី០៦ ខែមីនា ឆ្នាំ២០២៤ កម្លាំងការិយាល័យនគរបាលប្រឆាំងគ្រឿងញៀន សហការជាមួយកម្លាំងផែនសន្តិសុខផ្ទៃក្នុង បានឆ្មក់ចូលបង្ក្រាបទីតាំងខារ៉ាអូខេ ”ជីនឌានហ្ស៊ីយីម៉ៃទូ” (KTV &BAR) ចំនួន១ទីតាំង ដែលមានទីតាំងស្ថិតនៅ ក្រុម២ ភូមិ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ពាក់ព័ន្ធជួញ ដូរ រក្សាទុក សម្រួលឲ្យប្រើប្រាស់ និង កែច្នៃដោយខុសច្បាប់នូវសារធាតុញៀន ឃាត់មនុស្សចំនួន ៨៧នាក់ ស្រី៤៣នាក់។
នៅក្នុងរបាយការណ៍ដដែលបានឲ្យដឹងបន្ថែមទៀតថា វត្ថុតាងដែលសមត្ថកិច្ចដកហូតបានរួមមាន៖ ម្សៅសថ្លា សង្ស័យសារធាតុញៀនចំនួន១១កញ្ចប់, ម្សៅក្រាម ពណ៌ស សង្ស័យសារធាតុញៀនចំនួន៧ដប, ដុំក្រាម ពណ៌ស សង្ស័យសារធាតុញៀនចំនួន២កញ្ចប់, ថ្នាំគ្រាប់ សញ្ញា WY សង្ស័យសារធាតុញៀនចំនួន១គ្រាប់, សារធាតុរាវ (ទឹក) សង្ស័យសារធាតុញៀនចំនួន៣៥ដប, ថ្នាំគ្រាប់ ពណ៌ផ្ទៃមេឃ និង ពណ៌លឿង សង្ស័យសារធាតុញៀនចំនួន៥ចំណិត, កញ្ចប់ចម្រុះពណ៌ សង្ស័យសារធាតុញៀនចំនួន១០កញ្ចប់, រុក្ខជាតិញៀន (កញ្ឆាក្រៀម) ចំនួន២កញ្ចប់, ឧស្ម័នណាយទ្រីអុកសៃ (Nitrous oxide) បញ្ចូលក្នុងប៉េងប៉ោងចំនួន៣បំពង, ឧបករណ៍កែច្នៃគ្រឿងញៀនមួយចំនួន, ដបកែច្នៃ សម្រាប់ប្រើប្រាស់គ្រឿងញៀន៦ដប, ជញ្ជីងសម្រាប់ថ្លឹង គ្រឿងញៀនចំនួន៦គ្រឿង, សារធាតុផ្សំ (មិនច្បាស់) មួយចំនួន, សម្ភារៈសម្រាប់វេចខ្ចប់ និង ប្រើប្រាស់គ្រឿងញៀនមួយចំនួន, ជ្រុញសម្រាប់ប្រើប្រាស់គ្រឿងញៀនមួយចំនួន, លិខិតឆ្លងដែនចំនួន៥ក្បាល និង កាតរឹងមួយចំនួន។
ករណីខាងលើនេះ បច្ចុប្បន្ន សមត្ថកិច្ចសាកសួរ ស្រាវជ្រាវបន្ត តាមនីតិវិធីច្បាប់៕