កាលពីវេលាម៉ោង៤:៥៥នាទីរសៀល ថ្ងៃអាទិត្យ ៨កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃអាទិត្យ ទី១៧ ខែមីនា ឆ្នាំ២០២៤ ម្សិលមិញនេះ មានអគ្គិភ័យឆេះផ្ទះប្រជាពលរដ្ឋអស់ចំនួន២ខ្នង ដែលមានតាំងស្ថិតនៅ ក្រុមទី០១ ភូមិដូង ឃុំបឹងរាំង ស្រុកកំរៀង ខេត្តបាត់ដំបង។
ផ្ទះប្រជាពលរដ្ឋចំនួន២ខ្នង ដែលត្រូវអគ្គិភ័យឆេះខាងលើនេះ ជារបស់ម្ចាស់ផ្ទះ ទី១. ឈ្មោះ អុល សុវត្ថិភាព ភេទស្រី អាយុ៥០ឆ្នាំ មុខរបរកសិករ ដែលមានផ្ទះទំហំ ០៤ម៉ែត្រ x ១២ម៉ែត្រ ចំនួន២ជាន់ ធ្វើអំពីឥដ្ឋបុកឈើលើ។ ម្ចាស់ផ្ទះបិទទ្វារផ្ទះ ទៅធ្វើការនៅឯខេត្តព្រះវិហារ ខូចខាតទាំងស្រុង និង ទី២. ឈ្មោះ ឯម វិសុទ្ធរង្សី ភេទប្រុស អាយុ៣៩ឆ្នាំ មុខរបរមន្រ្តីរាជការ ជាអនុប្រធានច្រកអន្តរជាតិដូង ដែលមានផ្ទះទំហំ ០៥ម៉ែត្រ x ១៥ ម៉ែត្រ ផ្ទះតៀមផ្ទាល់ដីម៉ូដថៃ រាលឆ្លងមកពីផ្ទះ ដែលមានម្ចាស់ឈ្មោះ អុល សុវត្ថិភាព បណ្ដាលឲ្យឆេះខូចខាតផ្ទះមួយចំហៀងផ្ទះប្រម៉ាណ៣០%។
នៅក្នុងហេតុការណ៍ខាងលើនេះ កម្លាំងនគរបាលស្រុកកំរៀង បានដឹកនាំកម្លាំងចុះពន្លត់អគ្គិភ័យនេះ ដោយប្រើប្រាស់រថយន្តពន្លត់អគិ្គភ័យនៃអធិការស្រុកចំនួន៥គ្រឿង ទើបគ្រប់គ្រងអគ្គិភ័យនេះបានទាំងស្រុង។ មូលហេតុនៃអគ្គិភ័យនេះ សមត្ថកិច្ចជំនាញ កំពុងធ្វើការស្រាវជ្រាវបន្ដពីដើមហេតុ ដែលបង្កជាអគ្គិភ័យនេះឡើង៕
