កាលពីរសៀលថ្ងៃព្រហស្បតិ៍ ១៣កើត ខែមាឃ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃព្រហស្បតិ៍ ទី២២ ខែកុម្ភៈ ឆ្នាំ២០២៤ ម្សិលមិញនេះ មានគ្រោះថ្នាក់ចរាចរណ៍មួយកើតឡើងរវាងម៉ូតូ និង ម៉ូតូ បណ្តាលឲ្យបុរសម្នាក់រងរបួសធ្ងន់ និង យុវសិស្សម្នាក់ រងរបួសស្រាល ដែលមានទីតាំងស្ថិតនៅតាមផ្លូវបេតុងមួយកន្លែងក្នុង ភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
មុនពេលកើតហេតុ យុវសិស្ស ឈ្មោះ ហេង ហ័ង អាយុ១៧ឆ្នាំ មុខរបរសិស្សថ្នាក់ទី១២ មានទីលំនៅក្នុងភូមិកើតហេតុខាងលើ បានជិះម៉ូតូម៉ាក ហុងដា ឌ្រីម សេ១២៥ ពណ៌ខ្មៅ ពាក់ស្លាកលេខ ភ្នំពេញ 1GP-7186 ចំនួន១គ្រឿង ចេញពីផ្ទះមួយកន្លែង ក្នុងទិសដៅបញ្ច្រាសទិសចរាចរណ៍ ពីទិសខាងជើងទៅទិសខាងត្បូង ក្នុងល្បឿនយ៉ាងលឿន។ លុះពេលទៅដល់ត្រង់ចំណុចកើតហេតុខាងលើ ក៏ជ្រុលទៅបុកជាមួយនឹងម៉ូតូម៉ាក ហុងដា ប៊ីត ពណ៌ស ពាក់ស្លាកលេខ ភ្នំពេញ 1HF-1722 ចំនួន១គ្រឿង កំពុងធ្វើដំណើរក្នុងទិសដៅពីទិសខាងត្បូងទៅទិសខាងជើង បណ្តាលឲ្យយុវសិស្សខាងលើ រងរបួសស្រាល ចំណែកឯឈ្មោះ សៅ សារ៉ាន អាយុ៣៥ឆ្នាំ មុខរបរកម្មកររោងចក្រ មានស្រុកកំណើតនៅ ភូមិខ្សែត្រ ឃុំខ្សែត្រ ស្រុកកំពង់រោទិ៍ ខេត្តស្វាយរៀង ស្នាក់នៅផ្ទះជួលមួយកន្លែងក្នុង ភូមិអូរដឹម សង្កាត់ចោមចៅទី៣ ខណ្ឌពៅធិសែនជ័យ រជធានីភ្នំពេញ រងរបួសធ្ងន់។
ក្រោយពេលកើតហេតុ បុរសរងគ្រោះខាងលើ ត្រូវបានក្រុមសង្គ្រោះអង្គភាព៧១១ បញ្ជូនទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់។ ចំណែកឯយុវសិស្សរងរបួសស្រាល ត្រូវបានបញ្ជូនទៅកាន់មន្ទីរពេទ្យដោយក្រុមគ្រួសារ ដើម្បីជួយសង្គ្រោះ។ ចំពោះម៉ូតូទាំង២គ្រឿងរបស់ជនរងគ្រោះខាងលើនេះ ត្រូវបាននគរបាលចរាចរខណ្ឌពោធិ៍សែនជ័យ បានចុះធ្វើការវាស់វែង និង នាំយកទៅរក្សាទុក រង់ចាំការដោះស្រាយតាមក្រោយ៕
