ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិកមើលឃើញថា ប្រទេសកូរ៉េខាងជើង នឹងបន្តស្វែងរកសមត្ថភាពនុយក្លេអ៊ែររបស់ខ្លួនបន្ថែមទៀត ខណៈពេលដែលប្រទេសនេះមានគោលបំណង ដើម្បីសម្រេចបាននូវការទទួលស្គាល់ជាអន្តរជាតិ ជាមហាអំណាចនុយក្លេអ៊ែរ ដែលមានសក្ដានុពល ដោយមានជំនួយពីប្រទេសរុស្ស៊ី។
តើមានអ្វីកើតឡើងក្នុងចិត្តរបស់មេដឹកនាំប្រទេសកូរ៉េខាងជើង លោក គីម ជុង-អ៊ុន? ហើយអ្វីទៅជាគម្រោងរបស់លោកទៅថ្ងៃអនាគត?
ការិយាល័យនាយកទីភ្នាក់ងារស៊ើបការណ៍សម្ងាត់ជាតិរបស់សហរដ្ឋអាមេរិកបាននិយាយថា នៅក្នុងរបាយការណ៍វាយតម្លៃការគម្រាមកំហែងប្រចាំឆ្នាំរបស់ខ្លួនថា លោក គីម មិនមានចេតនាបោះបង់ចោលកម្មវិធីនុយក្លេអ៊ែររបស់ខ្លួននោះទេ ដែលលោកដឹងថាជា “អ្នកធានាសន្តិសុខរបបមួយនេះ និង មោទនភាពជាតិ”។ ខ្លួនបាននិយាយទៀតថា “មេដឹកនាំកូរ៉េខាងជើង លោក គីម ជុង-អ៊ុន នឹង បន្តស្វែងរកសមត្ថភាពនុយក្លេអ៊ែរ និង យោធា ដែលគម្រាមកំហែងដល់សហរដ្ឋអាមេរិក និង សម្ព័ន្ធមិត្តរបស់ខ្លួន ដែលនឹងអនុញ្ញាតឲ្យមានសកម្មភាពឈ្លានពានតាមកាលកំណត់ នៅពេលដែលលោកព្យាយាមកែប្រែបរិយាកាសសន្តិសុខក្នុងតំបន់តាមការពេញចិត្តរបស់លោក”។ បន្ទាប់មកបាននិយាយបន្ថែមទៀតថា ខ្លួនបានរៀបរាប់លម្អិតអំពីទំនាក់ទំនងរវាងក្រុងព្យុងយ៉ាង និង ក្រុងម៉ូស្គូនាពេលថ្មីៗនេះ ដោយនិយាយថា “លោក គីម ប្រហែលជាសង្ឃឹមថា លោកអាចប្រើប្រាស់ទំនាក់ទំនងការពារជាតិដ៏សម្បូរបែបរបស់ខ្លួនជាមួយនឹងប្រទេសរុស្ស៊ី ដើម្បីបន្តគោលដៅរបស់ខ្លួនក្នុងការសម្រេចបាននូវការទទួលស្គាល់ពីអន្តរជាតិថា ជាមហាអំណាចនុយក្លេអ៊ែរ”។
មន្ត្រីជាន់ខ្ពស់នៅក្រសួងបង្រួបបង្រួមជាតិកូរ៉េខាងត្បូង បានប្រាប់អ្នកសារព័ត៌មានកាលពីថ្ងៃអង្គារថា មហិច្ឆតារបស់ប្រទេសកូរ៉េខាងជើងក្នុងការក្លាយជារដ្ឋនុយក្លេអ៊ែរគឺជា “សុបិនឥតប្រយោជន៍”។
មន្ត្រីជាន់ខ្ពស់រូបនេះ បានបន្ថែមទៀតថា ទីក្រុងសេអ៊ូលនឹងបន្តជម្រុញទៅមុខជាមួយនឹងគោលនយោបាយរបស់ខ្លួន ដើម្បីរារាំងទីក្រុងព្យុងយ៉ាងពីការបន្តកម្មវិធីនុយក្លេអ៊ែររបស់ខ្លួន។
អ្នកជំនាញនិយាយថា របាយការណ៍នេះ បានបញ្ចូលយ៉ាងច្បាស់នូវការយល់ឃើញរបស់ប្រទេសកូរ៉េខាងជើងចំពោះសហគមន៍អន្តរជាតិ។
“គោលដៅចុងក្រោយសម្រាប់ប្រទេសកូរ៉េខាងជើង គឺសម្រាប់សហគមន៍អន្តរជាតិ បោះបង់ចោលនូវ ‘ស្តង់ដារទ្វេរដង’ របស់ខ្លួន ដែលខ្លួនមិនអាចអនុវត្តគោលនយោបាយ ដែលហាមឃាត់ប្រទេសកូរ៉េខាងជើងពីការក្លាយជាមហាអំណាចនុយក្លេអ៊ែរនោះទេ។
ទាក់ទិននឹងការវាយតម្លៃថា ប្រទេសកូរ៉េខាងជើងប្រហែលជាចង់ប្រើប្រាស់ទំនាក់ទំនងរបស់ខ្លួនជាមួយរុស្ស៊ី ដើម្បីសម្រេចបានគោលដៅនោះ ដែលអ្នកជំនាញបាននិយាយថា វានឹងមិនកើតឡើងក្នុងពេលណាមួយឆាប់ៗបានទេ។
“តាមទស្សនៈរបស់ប្រទេសរុស្ស៊ី ទោះបីជាកិច្ចសហប្រតិបត្តិការជាមួយនឹងប្រទេសកូរ៉េខាងជើង មានសារៈសំខាន់យ៉ាងណាក៏ដោយ ក៏វានឹងពិបាកក្នុងការទទួលយកការអះអាងរបស់ប្រទេសកូរ៉េខាងជើង ដោយឥតលាក់លៀម ខណៈដែលប្រទេសរុស្ស៊ី ចាត់ទុកថា វាជាឯកសិទ្ធិក្នុងការរក្សាសន្ធិសញ្ញាស្តីពីការមិនរីកសាយភាយនៃអាវុធនុយក្លេអ៊ែរ ជារដ្ឋថាមពលនុយក្លេអ៊ែរ”។
អ្នកជំនាញទាំងពីរបាននិយាយថា គោលដៅរបស់ លោក គីម អាចពឹងផ្អែកលើការវិវឌ្ឍន៍បន្ថែមទៀត រវាងទីក្រុងវ៉ាស៊ីនតោន និង ទីក្រុងម៉ូស្គូ៕
ប្រភព៖ ARIRANG, ថ្ងៃពុធ ទី១៣ ខែមីនា ឆ្នាំ២០២៤
