ទីភ្នាក់ងារសារព័ត៌មានរ៉យទ័រ ដែលដកស្រង់ប្រភពនៅក្នុងប្រទេសអេហ្ស៊ីបនិយាយថា កិច្ចការចរចាស្តីពីបទឈប់បាញ់ និង ការដោះលែងចំណាប់ខ្មាំងរវាងអ៊ីស្រាអែល និង ក្រុមហាម៉ាស់ ទំនងជានឹងចាប់ផ្តើមឡើងវិញនៅក្នុងប្រទេសអេហ្ស៊ីបនៅថ្ងៃអាទិត្យ។
ប៉ុន្តែប្រព័ន្ធផ្សព្វផ្សាយមួយចំនួនក្នុងប្រទេសអ៊ីស្រាអែល បានដកស្រង់សម្តីមន្ត្រីរដ្ឋាភិបាលជាន់ខ្ពស់របស់អ៊ីស្រាអែល ដែលនិយាយថា អ៊ីស្រាអែលនឹងមិនបញ្ជូនគណៈប្រតិភូរហូតដល់ខ្លួនទទួលបានបញ្ជីពេញលេញនៃចំណាប់ខ្មាំងដែលនៅរស់។
វានៅតែមិនប្រាកដថាតើអ៊ីស្រាអែលនឹងចូលរួមក្នុងកិច្ចចរចានេះឬអត់ ហើយថាតើនឹងមានការរីកចម្រើនដែរឬទេ ខណៈនៅតែមានចន្លោះប្រហោងធំៗរវាងប្រទេសទាំងពីរ។ កងកម្លាំងអ៊ីស្រាអែលបានបន្តការវាយលុកយ៉ាងខ្លាំងក្លានៅទូទាំងតំបន់ ហ្គាហ្សា ស្ត្រីប កាលពីថ្ងៃសៅរ៍។
អាជ្ញាធរសុខាភិបាលក្នុងតំបន់ហ្គាហ្សាបាននិយាយថា ការវាយប្រហារតាមផ្លូវអាកាសរបស់អ៊ីស្រាអែលនៅជិតមន្ទីរពេទ្យមួយកន្លែងក្នុងទីក្រុង Rafah ភាគខាងត្បូងបានសម្លាប់មនុស្ស១១នាក់ និង ប្រហែល៥០នាក់ផ្សេងទៀតរងរបួស។
ប្រជាជនជិត១.៥លាននាក់រស់នៅក្នុងទីក្រុង Rafah រួមទាំងអ្នកដែលបានភៀសខ្លួនចេញពីភាគខាងជើងនៃតំបន់ហ្គាហ្សា។
អាជ្ញាធរនិយាយថា ចំនួនអ្នកស្លាប់នៅក្នុងតំបន់នេះបានកើនដល់៣០,៣២០នាក់ហើយ។
សហរដ្ឋអាមេរិករួមជាមួយនឹងប្រទេស ដែលសម្រុះសម្រួលកិច្ចចរចាបទឈប់បាញ់នេះ សង្ឃឹមថា កិច្ចព្រមព្រៀងមួយនឹងត្រូវបានសម្រេចមុនខែដ៏វិសុទ្ធរបស់ជនជាតិមូស្លីមនៃថ្ងៃបុណ្យរ៉ាម៉ាដាន ដែលចាប់ផ្តើមនៅប្រហែលថ្ងៃទី១០ ខែមីនា ខាងមុខនេះ៕
ប្រភព៖ NHK, ថ្ងៃអាទិត្យ ទី០៣ ខែមីនា ឆ្នាំ២០២៤
