ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី កាលពីថ្ងៃពុធ បានធ្វើទស្សនកិច្ចនៅឧបទ្វីបបាល់កង់ជាលើកដំបូង ចាប់តាំងពីការផ្ទុះឡើងនៃវិបត្តិអ៊ុយក្រែន ដោយធ្វើការស្នើសុំការគាំទ្រផ្នែកយោធាពីមេដឹកនាំនៃប្រទេសទាំងនេះនៅក្នុងតំបន់។
ថ្លែងនៅក្នុងកិច្ចប្រជុំកំពូលអ៊ុយក្រែន-អឺរ៉ុបអាគ្នេយ៍ ដែលធ្វើឡើងនៅប្រទេសអាល់បានី លោក ហ្សេឡេនស្គី បាននិយាយថា ការផ្គត់ផ្គង់អាវុយុទ្ធភ័ណ្ឌកំពុងប៉ះពាល់ដល់ស្ថានភាពនៅលើសមរភូមិ ហើយបានអំពាវនាវដល់មេដឹកនាំបាល់កង់ឱ្យជួយ។
លោកក៏បានស្នើឱ្យរៀបចំវេទិកាការពារជាតិអ៊ុយក្រែន-បាល់កង់ ដើម្បីពង្រឹងកិច្ចសហប្រតិបត្តិការផ្នែកសព្វាវុធ។
ដោយសារតែការបរាជ័យក្នុងការគាំទ្រផ្នែកយោធាពីសម្ព័ន្ធមិត្តលោកខាងលិច លោក ហ្សេឡេនស្គី បាននឹងកំពុងធ្វើដំណើរជុំវិញពិភពលោក ដើម្បីជម្រុញឲ្យមានការគាំទ្រប្រទេសអ៊ុយក្រែន។
ថ្មីៗនេះ លោកបានជួបពិភាក្សាជាមួយព្រះអង្គម្ចាស់ Mohammed bin Salman នៅប្រទេសអារ៉ាប៊ីសាអូឌីត ជុំវិញការផ្លាស់ប្តូរអ្នកទោសគ្នាជាមួយនឹងប្រទេសសរុស្ស៊ី៕
ប្រភព៖ ARIRANG, ថ្ងៃព្រហស្បតិ៍ ទី២៩ ខែកុម្ភៈ ឆ្នាំ២០២៤
