(បាល់ទះ)៖ ក្រុមបាល់ទះវិសាខារបស់កម្ពុជា បានកក់កៅអីឡើងទៅកាន់វគ្គពាក់កណ្តាលផ្តាច់ព្រ័ត្រពានរង្វាន់ Win+Steak Volleyball Invitation ហើយបន្ទាប់ពីយកឈ្នះក្រុមជើងខ្លាំងជប៉ុន Saitama Azalea ដោយលទ្ធផល ៣សិតទល់នឹង១។
ការប្រកួតដ៏ជក់ចិត្តនេះ ក្នុងសិតទី១ វិសាខា ពិតជាធ្វើបានល្អមែនទែន ពោលគឺបានយកឈ្នះ Saitama Azalea ក្នុងលទ្ធផល ២៧-២៥។ លុះដល់សិតទី២ វិសាខា នៅតែបន្តធ្វើបានល្អដដែល ដោយបានបន្តយកឈ្នះ Saitama Azalea ដោយលទ្ធផល ២៥-១៨។ យ៉ាងណាមិញ នៅសិតទី៣ Saitama Azalea បានវាយបកយកឈ្នះវិញ ដោយលទ្ធផល ២៥-២៧។ ទោះបីជាយ៉ាងណាក៏ដោយ នៅសិតទី៣ វិសាខា បានធានាកៅអីទៅកាន់វគ្គពាក់កណ្ដាលផ្ដាច់ព្រ័ត្រ បន្ទាប់ពីទទួលបានជ័យជម្នះដោយលទ្ធផល ២៥-២៣។
គួររំលឹកថា ក្នុងប្រកួតទី១ វិសាខា បានយកឈ្នះក្រុមអូស្ត្រាលី Volleyball Academy ក្នុងលទ្ធផល ៣-០ (២៦-២៤, ២៥-២៣ និង ២៥-១៨) និងការប្រកួតទី២ វិសាខា ចាញ់ Win Streak ក្នុងលទ្ធផល ២-៣ (២២-២៥, ២៥-២២, ១៩-២៥, ២៧-២៥ និង ១៣-១៥។
សម្រាប់ការប្រកួតវគ្គពាក់កណ្តាលផ្តាច់ព្រ័ត្រ វិសាខា ត្រូវប៉ះក្រុមលេខ១ ក្នុងពូល A នៅ វេលាម៉ោង ៣ រសៀល ថ្ងៃទី១ ខែមិថុនា ឆ្នាំ២០២៤ នេះ៕
