គណៈកម្មាធិការរៀបចំការបោះឆ្នោតរបស់ប្រទេសប៉ាគីស្ថាននិយាយថា បេក្ខជនឯករាជ្យរបស់គណបក្សប្រឆាំងគាំទ្រដោយអតីតនាយករដ្ឋមន្ត្រី Imran Khan ដែលជាប់ពន្ធនាគារ បានទទួលអាសនៈច្រើនជាងគេនៅក្នុងការបោះឆ្នោតសកលកាលពីថ្ងៃព្រហស្បតិ៍កន្លងទៅនេះ។ ប៉ុន្តែពួកគេបរាជ័យក្នុងការទទួលបានសំឡេងភាគច្រើននៅក្នុងសភា ដែលជំរុញឱ្យគណបក្សគ្រប់គ្រងអំណាចចាប់ផ្តើមកិច្ចចរចាចម្រុះ។
គណៈកម្មាធិការបាននិយាយកាលពីថ្ងៃអាទិត្យម្សិលមិញនេះថា បេក្ខជនដែលជាប់ពាក់ព័ន្ធជាមួយ លោក Khan និង អ្នកឯករាជ្យផ្សេងទៀតទទួលបាន១០១ អាសនៈ ក្នុងចំណោម២៦៦អាសនៈ ដែលត្រូវបានប្រកួតប្រជែងដោយការបោះឆ្នោតដោយផ្ទាល់។
គណៈកម្មាធិការបាននិយាយថា អាសនៈចំនួន៧៥ បានទៅលើគណបក្សសម្ព័ន្ធមូស្លីមប៉ាគីស្ថាន ដែលជាគណបក្សដឹកនាំដោយអតីតនាយករដ្ឋមន្ត្រី លោក ណាវ៉ាស សារីហ្វ។
ក្រុមអ្នកវិភាគបានឃ្លាំមើលយ៉ាងដិតដល់ថាតើគណបក្សរបស់ លោក សារីហ្វ ដែលត្រូវបានគេនិយាយថា មានទំនាក់ទំនងល្អជាមួយយោធា នឹងរក្សាការគ្រប់គ្រងរបស់រដ្ឋាភិបាលដែរឬទេ។
លោក Khan ដឹកនាំគណបក្សប្រឆាំងប៉ាគីស្ថាន Tehreek-e-Insaf ឬ PTI ដែលជាគណបក្សដ៏មានប្រជាប្រិយភាពពីអ្នកបោះឆ្នោតវ័យក្មេង។ អតីតតារាកីឡា cricket រូបនេះ មិនមានសិទ្ធិឈរឈ្មោះក្នុងការបោះឆ្នោត ខណៈដែលលោកកំពុងជាប់ពន្ធនាគារពីបទពុករលួយ និង បទចោទប្រកាន់ផ្សេងទៀត។ បេក្ខជនរបស់គណបក្សលោកត្រូវឈរឈ្មោះជាអ្នកឯករាជ្យ។
ទោះបីជាមានការប្រកាសដោយគណៈកម្មាធិការរៀបចំការបោះឆ្នោតយ៉ាងណាក៏ដោយ ក៏គេរំពឹងថា នឹងចំណាយពេលច្រើនទៀត មុនពេលលទ្ធផលនៅក្នុងមណ្ឌលបោះឆ្នោតមួយចំនួនអាចត្រូវបានបញ្ចប់។
បេក្ខជនដែលជាប់ពាក់ព័ន្ធជាមួយ PTI ជាច្រើន បានយកក្តីកង្វល់របស់ពួកគេទៅកាន់តុលាការ ដោយបានប្រកាសជ័យជំនះលើគូប្រជែងរបស់ពួកគេ។ ពួកគេនិយាយថា ពួកគេច្បាស់ជាបានសន្លឹកឆ្នោតច្រើនជាងការរាប់ចេញដោយមន្ត្រីរៀបចំការបោះឆ្នោត។ គណបក្ស PTI ក៏កំពុងធ្វើការតវ៉ាជុំវិញបញ្ហានេះផងដែរ។
ប្រព័ន្ធផ្សព្វផ្សាយក្នុងស្រុកជាច្រើនរាយការណ៍ថា គ្មានគណបក្សណាមួយទទួលបានសំឡេងភាគច្រើននៅក្នុងការបោះឆ្នោតនោះទេ ដោយលើកឡើងពីតម្រូវការក្នុងការបង្កើតរដ្ឋាភិបាលចម្រុះ។ គណបក្សរបស់ លោក សារីហ្វ បច្ចុប្បន្នកំពុងស្ថិតក្នុងកិច្ចចរចាចម្រុះជាមួយនឹងកងកម្លាំងផ្សេងៗទៀត រួមមានគណបក្សប្រជាជនប៉ាគីស្ថាន ឬ PPP។
ប្រភព៖ NHK, ថ្ងៃអាទិត្យ ទី១១ ខែកុម្ភៈ ឆ្នាំ២០២៤
