កាលពីថ្ងៃព្រហស្បតិ៍ ទី១១ ខែមេសា ម្សិលមិញនេះ សេតវិមានបាននិយាយថា សហរដ្ឋអាមេរិកបានទាក់ទងទៅកាន់ប្រទេសអ៊ីរ៉ង់ថា ខ្លួនមិនបានជាប់ពាក់ព័ន្ធក្នុងការវាយប្រហារតាមផ្លូវអាកាស ប្រឆាំងនឹងមេបញ្ជាការយោធាកំពូលអ៊ីរ៉ង់ នៅទីក្រុងដាម៉ាសនោះទេ។
លោកស្រី Karine Jean-Pierre លេខាធិការសារព័ត៌មានសេតវិមាន បានប្រាប់អ្នកសារព័ត៌មានថា យើងបានទាក់ទងទៅកាន់ប្រទេសអ៊ីរ៉ង់ថា សហរដ្ឋអាមេរិកមិនមានការជាប់ពាក់ព័ន្ធក្នុងការវាយប្រហារ ដែលបានកើតឡើងនៅក្នុងទីក្រុងដាម៉ាសនោះទេ ហើយយើងបានព្រមានប្រទេសអ៊ីរ៉ង់ មិនឱ្យប្រើការវាយប្រហារនេះ ធ្វើជាលេស ដើម្បីបង្កើនភាពតានតឹងបន្ថែមទៀតនៅក្នុងតំបន់ ឬ ដើម្បីវាយប្រហារទីតាំង ឬ បុគ្គលិករបស់សហរដ្ឋអាមេរិកឡើយ។
យន្តហោះចម្បាំងអ៊ីស្រាអែលដែលសង្ស័យថា បានធ្វើការវាយប្រហារដោយទម្លាក់គ្រាប់បែកលើស្ថានទូតអ៊ីរ៉ង់នៅទីក្រុងដាម៉ាស កាលពីថ្ងៃច័ន្ទ បានសម្លាប់មេបញ្ជាការយោធាអ៊ីរ៉ង់ និង បានកត់សម្គាល់ឃើញថា ភាពតានតឹងបានកើនឡើងកាន់តែខ្លាំងនៅក្នុងសង្គ្រាមរបស់អ៊ីស្រាអែលជាមួយសត្រូវក្នុងតំបន់របស់ខ្លួន។
សហរដ្ឋអាមេរិកមានប្រុងប្រយ័ត្នខ្ពស់អំពីការវាយប្រហារសងសឹកណាមួយ ដែលអាចកើតមានឡើងពីប្រទេសអ៊ីរ៉ង់ ហើយបេសកជនអាមេរិកបាននឹងកំពុងធ្វើការជាបន្ទាន់ ដើម្បីព្យាយាមកាត់បន្ថយភាពតានតឹងនេះ។
លោកស្រី Jean-Pierre បាននិយាយថា ច្បាស់ណាស់ យើងមិនចង់ឲ្យជម្លោះនេះ រីករាលដាលនោះទេ៕ ប្រភព៖ REUTERS
