កងកម្លាំងអ៊ីស្រាអែល បានបន្តការវាយប្រហារដ៏សាហាវរបស់ពួកគេនៅក្នុងតំបន់ ហ្គាហ្សា ស្ទ្រីប កាលពីថ្ងៃចន្ទ បើទោះបីជាខែដ៏ពិសិដ្ឋរបស់មូស្លីមនៃថ្ងៃបុណ្យរ៉ាម៉ាដានចាប់ផ្ដើមយ៉ាងណាក៏ដោយ។
អគ្គលេខាធិការអង្គការសហប្រជាជាតិ លោក អាន់តូនីអូ ហ្គូតេរ៉េស បានអំពាវនាវឱ្យមានបទឈប់បាញ់ជាបន្ទាន់មួយ។ លោកបាននិយាយថា “ទោះបីជាថ្ងៃបុណ្យរ៉ាម៉ាដានបានចាប់ផ្តើមក៏ដោយ ក៏ការសម្លាប់ ការទម្លាក់គ្រាប់បែក និង ការបង្ហូរឈាមនៅតែបន្តនៅក្នុងតំបន់ហ្គាហ្សា។ លោកក៏បាននិយាយផងដែរថា “វាជាពេលវេលាសម្រាប់សន្តិភាព” ដោយអំពាវនាវឱ្យមេដឹកនាំនយោបាយ សាសនា និង សហគមន៍ “ធ្វើអ្វីគ្រប់បែបយ៉ាងនៅក្នុងអំណាចរបស់ពួកគេ ដើម្បីធ្វើឲ្យរយៈពេលដ៏ពិសិដ្ឋនេះ ជាពេលវេលាសម្រាប់ការយល់ចិត្ត សកម្មភាព និង សន្តិភាព” ។
ប្រព័ន្ធផ្សព្វផ្សាយប៉ាឡេស្ទីនបាននិយាយថា ជនស៊ីវិលរាប់សិបនាក់ ត្រូវបានសម្លាប់ដោយការវាយប្រហាររបស់អ៊ីស្រាអែលកាលពីថ្ងៃចន្ទ នៅពេលដែលប៉ាឡេស្ទីនបានចាប់ផ្តើមតមអាហារជាច្រើនម៉ោងក្នុងពេលថ្ងៃ។
វីដេអូដែលថតដោយក្រុមកាមេរ៉ារបស់រ៉យទ័រនៅក្នុងទីក្រុង Rafah ភាគខាងត្បូងនៃតំបន់ហ្គាហ្សា បង្ហាញពីបុរសម្នាក់ ដែលបានភៀសខ្លួនចេញពីតំបន់ហ្គាហ្សា ភាគខាងជើង។ លោកបាននិយាយថា លោកមិនដែលចំណាយពេលថ្ងៃបុណ្យរ៉ាម៉ាដានដោយអស់សង្ឃឹមនោះទេ ប៉ុន្តែឥឡូវនេះ គាត់គ្មានចំណីអាហារហូបនោះទេ បន្ទាប់ពីតមអាហារពេលថ្ងៃ ហើយក៏គ្មានលុយទិញចំណីអាហារហូបដែរ។
មានការរីកចម្រើនតិចតួចក្នុងការចរចាសម្រាប់បទឈប់បាញ់ និង កិច្ចព្រមព្រៀងដោះលែងចំណាប់ខ្មាំងរវាងអ៊ីស្រាអែល និង ក្រុមហាម៉ាស។
ប្រព័ន្ធផ្សព្វផ្សាយលីបង់បានរាយការណ៍កាលពីថ្ងៃចន្ទថា សមាជិកជាន់ខ្ពស់ក្រុមហាម៉ាស់ បានត្អូញត្អែរអំពីប្រទេសកាតា អេហ្ស៊ីប និង សហរដ្ឋអាមេរិក ដែលកំពុងសម្រុះសម្រួលកិច្ចចរចានោះ។
សមាជិកក្រុមហាម៉ាស់ តាមសេចក្តីរាយការណ៍ បាននិយាយថា អ្នកសម្រុះសម្រួលទាំងនោះ មិននៅខាងក្រុមហាម៉ាសនោះទេ ប៉ុន្តែកំពុងបង្ហាញការយោគយល់ចំពោះការទាមទាររបស់អ៊ីស្រាអែលទៅវិញ។ ក្រុមហាម៉ាស់កំពុងអំពាវនាវឲ្យមានបទឈប់បាញ់ជាអចិន្ត្រៃយ៍។
នាយករដ្ឋមន្ត្រីអ៊ីស្រាអែល លោក ប៊េនចាមីន ណេតាន់យ៉ាហ៊ូ បានប្រាប់ទូរទស្សន៍ Fox News កាលពីថ្ងៃចន្ទថា អ៊ីស្រាអែលបានបំផ្លាញកងវរសេនាតូចប្រយុទ្ធរបស់ក្រុមហាម៉ាសចំនួនបីភាគបួន។ លោកបានបន្ថែមថា អ៊ីស្រាអ៊ែលគឺជិតនឹងការទទួលជ័យជម្នះហើយ។
ប្រភព៖ NHK, ថ្ងៃអង្គារ ទី១២ ខែមីនា ឆ្នាំ២០២៤
