𝐉𝐨𝐬𝐞𝐥𝐮 និង 𝐓𝐨𝐧𝐢 𝐊𝐫𝐨𝐨𝐬 ផ្លែផ្កាឲ្យគ្នា មុន អាល្លឺម៉ង់ ប៉ះ អេស្ប៉ាញ ក្នុងព្រឹត្តិការណ៍ EURO វគ្គ ៨ក្រុម យប់នេះ

នៅយប់ថ្ងៃសុក្រ ទី៥ ខែកក្កដា ឆ្នាំ២០២៤ វេលាម៉ោង ១១៖០០នាទីយប់ ក្រុមឥន្រ្ទីដែកអាល្លឺម៉ង ត្រូវធ្វើការធ្ងន់ដោយត្រូវតតាំងជាមួយក្រុមគោជល់អេស្ប៉ាញ វគ្គ៨ចុងក្រោយ ខណៈនេះអាចជាការប្រកួតចុងក្រោយរបស់ខ្សែបម្រើ Toni Kroos ជាមួយជម្រើសជាតិអាល្លឺម៉ង ប្រសិនបើក្រុមឥន្រ្ទីដែក ចាញ់ អេស្ប៉ាញ យប់នេះ។

យ៉ាងណាមិញ មុនការប្រកួតមកដល់ ក៏មានការប៉ះសម្ដីគ្នាផងដែរ រវាងមិត្តរួមក្រុមនៅក្លិប Real Madrid កីឡាករ Joselu និង Kroos។ ខ្សែប្រយុទ្ធ Joselu របស់អេស្ប៉ាញ បានអះអាងថា៖« ខ្ញុំស្រលាញ់ Toni ប៉ុន្តែខ្ញុំគិតថា ថ្ងៃសុក្រនេះគឺជាការប្រកួតចុងក្រោយហើយសម្រាប់ Toni ក្នុងក្រុមជម្រើសជាតិ»។

ភ្លាមៗបន្ទាប់ពីការលើកឡើងរបស់ Joselu ធ្វើឲ្យខ្សែបម្រើ Toni Kroos របស់អាល្លឺម៉ង់ បានឆ្លើយតបយ៉ាងខ្លីថា៖« ខ្ញុំចង់ផ្ដាំទៅកាន់ Joselu ថា ខ្ញុំនឹងមិនចូលនិវត្តន៍នៅថ្ងៃសុក្រនេះទេ»។

គួរបញ្ជាក់ថា ក្នុងព្រឹត្តិការណ៍ UEFA EURO ២០២៤នេះ ក្រុមជម្រើសជាតិអេស្ប៉ាញ និងក្រុមជម្រើសជាតិអាល្លឺម៉ង សុទ្ធតែធ្វើបានល្អដូចគ្នា ដោយមិនទាន់ចាញ់មួយប្រកួតឡើយនៅ៤ប្រកួតកន្លងមកនេះ ពោលគឺអេស្ប៉ាញ ឈ្នះទាំង ៤ប្រកួត ស៊ុតបាន ៩គ្រាប់ ខណៈ អាល្លឺម៉ង់ ឈ្នះ៣ ស្មើ១ ស៊ុតបាន ១០គ្រាប់៕