កម្ពុជាទទួលបានមេដាយសរុប៦គ្រឿង លើ៣ប្រភេទកីឡា ក្នុងព្រឹត្តិការណ៍កីឡាសាកលវិទ្យាល័យអាស៊ាន ២០២៤

កម្ពុជាដណ្តើមបានមេដាយសរុប ៦គ្រឿង ពីព្រឹត្តិការណ៍កីឡាសាកលវិទ្យាល័យអាស៊ាន លើកទី២១ ឆ្នាំ២០២៤ ដែលធ្វើឡើងនៅប្រទេសឥណ្ឌណេស៊ី ខណៈពេលនេះ កីឡាករ កីឡាការិនីកម្ពុជា បានមកដល់មាតុប្រទេសវិញហើយ កាលពីយប់ថ្ងៃទី០៣ ខែកក្កដា ឆ្នាំ២០២៤។

ថ្លែងនៅក្នុងពិធីទទួលស្វាគមន៍ នៅអាកាសយានដ្ឋានអន្តរជាតិភ្នំពេញ ឯកឧត្តម សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន គូសបញ្ជាក់ឲ្យដឹងថា នៅពេលនេះ កម្ពុជាទទួលបានមេដាយសរុបចំនួន៦គ្រឿង ហើយចំពោះ៣ប្រភេទកីឡាដែលមកដល់កម្ពុជាមុនគេ ដូចជា ប៉េតង់ យូដូ និងហែលទឹកនេះ គឺទទួលបានមេដាយ៥គ្រឿង ក្នុងនោះប្រភេទកីឡាប៉េតង់ ដណ្តើម៤គ្រឿង មានមេដាយមាស១ ប្រាក់១ និងសំរឹទ្ធ២គ្រឿង និងកីឡាយូដូ ទទួលបានមេដាយប្រាក់១គ្រឿង។

ជាមួយគ្នានេះ ឯកឧត្តមរដ្ឋលេខាធិការ ក៏បានលើកទឹកចិត្តដល់កីឡាករ កីឡាការិនីទាំងអស់ទាំងជនមានពិការភាព និងមិនពិការ សូមបន្តការខិតខំប្រឹងប្រែងហ្វឹកហាត់កីឡាឱ្យមានគុណភាពខ្ពស់ ដើម្បីលើកកម្ពស់ដល់ការរីកចម្រើននៃវិស័យកីឡាកម្ពុជា ក៏ដូចជាលើកទឹកចិត្តដល់ប្រជាពលរដ្ឋចូលរួមលេងកីឡា ដើម្បីសុខភាពឱ្យកាន់តែល្អប្រសើរបន្ថែមទៀត។ 

គិតត្រឹមថ្ងៃព្រឹកថ្ងៃទី០៤ ខែកក្កដា ឆ្នាំ២០២៤ កម្ពុជា យើងទទួលបានមេដាយសរុបចំនួន ៦គ្រឿង ក្នុងនោះមេដាយមាស ១គ្រឿង ប្រាក់ ៣គ្រឿង និងសំរឹទ្ធ ២គ្រឿង ដោយមេដាយសរុប៦គ្រឿងនេះ ដណ្តើមបានលើ៣ប្រភេទកីឡា ដូចជាប៉េតង់ ៤គ្រឿង យូដូ មេដាយប្រាក់១គ្រឿង និងតេក្វាន់ដូ WT មេដាយប្រាក់១គ្រឿង។

គួរបញ្ជាក់ថា កម្ពុជាបានបញ្ជូន៦ប្រភេទកីឡា ក្នុងនោះ៣ប្រភេទកីឡាបានបញ្ចប់ការប្រកួត និងបានមកដល់មាតុប្រទេសវិញ និង៣ប្រភេទកីឡាទៀត ដូចជា តេក្វាន់ដូ WT ការ៉ាតេ និងអត្តពលកម្មកំពុងបន្តការប្រកួត រហូតដល់បញ្ចប់ព្រឹត្តិការណ៍នាថ្ងៃទី០៦ ខែកក្កដា ឆ្នាំ២០២៤ នៅប្រទេសឥណ្ឌូណេស៊ី៕