កម្ពុជា ដណ្ដើមបានមេដាយ២គ្រឿងបន្ថែមទៀត ពីព្រឹត្តិការណ៍កីឡានិស្សិតអាស៊ាន នៅឥណ្ឌូណេស៊ី

កាលពីល្ងាចថ្ងៃទី២៧ ខែមិថុនា ឆ្នាំ២០២៤នេះ កម្ពុជា បានបន្តឈ្នះមេដាយ២គ្រឿងបន្ថែមទៀត លើប្រភេទកីឡាប៉េតង់ នៅក្នុងការប្រកួតកីឡាសកលវិទ្យាល័យអាស៊ាន លើកទី២១ (21st ASEAN University Games) នៅប្រទេសឥណ្ឌូណេស៊ី ។

មេដាយ២គ្រឿង ដែលកម្ពុជា ទទួលបាននេះ គឺមេដាយមាស១គ្រឿង និងសំរឹទ្ធ១គ្រឿង។មេដាយមាស១គ្រឿងរបស់កម្ពុជា ដណ្តើមបានដោយកីឡាករ ពុធយ៉ុន ច័ន្ទដារ៉ា លើវិញ្ញាសាបុរស ១ទល់១ បន្ទាប់ពីបានយកឈ្នះកីឡាករថៃ ក្នុងលទ្ធផល ១៣-០៧ នៅវគ្គផ្តាច់ព្រ័ត្រ ។ ចំណែក មេដាយសំរឹទ្ធវិញ ដណ្តើមបានដោយកីឡាការិនី ហៀង វិជ្ជនី លើវិញ្ញាសានារីវាយយកពិន្ទុ ដោយយកឈ្នះកីឡាការិនីថៃ ដូចគ្នា ក្នុងលទ្ធផល ១៣-០៧ នៅវគ្គផ្តាច់ព្រ័ត្រ ។ 

គួរបញ្ជាក់ថា គិតត្រឹមល្ងាចថ្ងៃទី២៧ ខែមិថុនា ឆ្នាំ២០២៤ កម្ពុជា ដណ្តើមបានមេដាយសរុបចំនួន ៣គ្រឿង ហើយ ក្នុងនោះមាន មេដាយមាស ១គ្រឿង ប្រាក់ ១គ្រឿង និងសំរឹទ្ធ ១គ្រឿង ដោយមេដាយដំបូងគេដណ្តើមបានដោយកីឡាការិនីយូដូ កែវ វ៉ាន់ឌឿន។ ការប្រកួតកីឡាសាកលវិទ្យាល័យអាស៊ានលើកទី២១នេះ កម្ពុជា បានបញ្ជូនប្រតិភូកីឡា គ្រូបង្វឹក និងកីឡាករកីឡាការិនីចំនួន ៤៥នាក់ ដែលមាន៦ប្រភេទកីឡា ដូចជា ប៉េតង់, តេក្វាន់ដូ WT, អត្តពលកម្ម, ការ៉ាតេ, ហែលទឹក និងយូដូ៕