បាត់ដំបង៖ នៅថ្ងៃទី០៣ ខែកុម្ភៈ ឆ្នាំ២០២៤ វេលាម៉ោង០៤:០០នាទីទៀបភ្លឺ នៅចំណុចក្រុមទី១៤ ភូមិបត់សាលា ឃុំឈើទាល ស្រុកបាណន់ ខេត្តបាត់ដំបង មានករណីអគ្គិភ័យឆាបឆេះរោង (កសិដ្ឋានចិញ្ចឹមមាន់ប្រជាពលរដ្ឋ) ចំនួន ០៣ខ្នង (ឆេះទាំងស្រុង) ទំហំ ៦០ម៉ែត្រ x ០៨ម៉ែត្រ សង់អំពីឈើ ប្រក់សង្ក័សី និងឆេះរោងឡានប្រក់សង្ក័សីចំនួន ០១ខ្នង ១៥ម៉ែត្រ x ១២ម៉ែត្រ របស់ម្ចាស់ផ្ទះឈ្មោះ ឌិប ផាឌីន ភេទប្រុស អាយុ ៤២ឆ្នាំ រស់នៅភូមិបត់សាលា ឃុំឈើទាល ស្រុកបាណន់ ខេត្តបាត់ដំបង ។ សម្ភារខូចខាតរួមមាន៖
-ឆេះរោងកសិដ្ឋានចិញ្ចឹមមាន់ ចំនួន ០២ខ្នង ។
-ឆេះរោងឡានចំនួន ០១ខ្នង ។
-ឆេះរថយន្តចំនួន ០២គ្រឿង ម៉ាកCamery បាឡែន ០១គ្រឿង និងរថយន្ដHyundai ២,៥តោន ០១គ្រឿង ។
-ឆេះម៉ូតូចំនួន ០៤គ្រឿង: ម៉ាកសង់កូរ៉េ០១គ្រឿង ឌ្រីម ០២គ្រឿង និងរុឺម៉ក០១គ្រឿង ។
-ឆេះកង់ចំនួន ០៣គ្រឿង ។
-ងាប់មាន់ពីរោងអស់ចំនួន ១២.០០០ក្បាល ។
សរុបគិតជាទឹកប្រាក់អស់ចំនួន២០០.០០០ដុល្លា (ម្ភៃមុឺនដុល្លា) ។
សមត្ថកិច្ចជំនាញ បានឲ្យដឹងថា៖ ក្នុងករណីអគ្គិភ័យនេះ អាចបណ្ដាលមកពីឆេះប្រព័ន្ធហ្គេសកំដៅមាន់ ទើបបណ្តាលឲ្យមានអគ្គិភ័យឆាបឆេះ។ ករណីនេះ កម្លាំងនគរបាលស្រុកបាណន់ បានដឹកនាំកម្លាំងចុះពន្លត់អគ្គិភ័យនេះ ដោយប្រើប្រាស់រថយន្តពន្លត់អគិ្គភ័យ ស្នងការចំនួន០២គ្រឿង, រថយន្តស្រុកសង្កែ ០១គ្រឿង និងរថយន្តស្រុកបាណន់ ០១គ្រឿង បានប្រើប្រាស់ទឹកអស់ចំនួន ១៥ឡាន ទើបគ្រប់គ្រងស្ថានការណ៍អគ្គិភ័យនេះបានទាំងស្រុង៕
