សហគមន៍កសិកម្មទំនើបគឺជាគោលនយោបាយអាទិភាពមួយរបស់រាជរដ្ឋាភិបាលដែលបង្កើតឡើង ដើម្បីជំរុញផលិតភាពនៃផលិតផលកសិកម្ម និងការប្រកួតប្រជែងទីផ្សារ តាមរយៈការប្រែក្លាយ ការធ្វើកសិកម្មលក្ខណៈគ្រួសារ ទៅជាការធ្វើកសិកម្មលក្ខណៈឧស្សាហកម្ម ទៅការចងក្រងគ្នាជា សហគមន៍ធំ មានសេដ្ឋកិច្ច មានប្រាក់ខែដើម្បីកាត់បន្ថយថ្លៃដើមផលិត ព្រមទាំងការការពារហានិ ភ័យទីផ្សារ ដោះស្រាយបញ្ហាកង្វះបច្ចេកទេស ដើមទុន និងការប្រែប្រួលអាកាសធាតុជាដើម។
ទាក់ទិននឹងចំណុចនេះ ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្មបានឱ្យដឹងថា គោលនយោបាយថ្មីនេះ នឹងជួយកាត់បន្ថយថ្លៃដើមផលិត បង្កើនស្តង់ដារគុណភាពផលដំណាំ ជាពិសេសគឺធានាស្ថេរភាពទីផ្សារ។
ហើយចំណុចពិសេសមួយនៃសហគមន៍កសិកម្មទំនើបនេះគឺ ការស្វែងរកការផ្សារភ្ជាប់ទៅ កាន់ទីផ្សារមុននឹងធ្វើផលិតកម្ម ដាច់ខាតយើងមិនផលិតហើយ ទើបដើររកទីផ្សារទេ។ នេះបើតាមការបញ្ជាក់ បន្ថែមរបស់ឯកឧត្តម ឃឹម ហ្វីណង់។
ឯកឧត្តមបានគូសបញ្ជាក់ផងដែរថា៖ «សព្វថ្ងៃនេះ យើងកំពុងជំរុញឱ្យកសិករចងក្រងគ្នាជាសហគមន៍កសិកម្មទំនើប ក្នុងនោះដំណាំយុទ្ធ សាស្ត្រចំនួន៤ ដែលយើងនឹងផ្ដោតគឺ ដំណាំស្រូវ ដំណាំស្វាយចន្ទី ម្រេច និងបន្លែ។»
ជាមួយគ្នានេះ សហគមន៍កសិកម្មសំបូរមានជ័យ ដែលស្ថិតនៅស្រុកស្ទឹងត្រង់ ខេត្តកំពង់ចាម ជាសហគមន៍ដំបូងបង្អស់មួយ ក្នុងចំណោមសហគមន៍ចំនួន៣ ដែលបានគាំទ្រ និងកំពុងរៀបចំខ្លួនដើម្បីអនុវត្តសាកល្បងមធ្យោបាយ និងវិធីសាស្ត្រកសិកម្មតាមបែបផែនថ្មី ដែលមានការចងក្រងរចនាសម្ព័ន្ធដឹកនាំ គ្រប់គ្រង និងផែនការសកម្មភាពច្បាស់លាស់ ដើម្បីធានាខ្សែច្រវាក់ផ្គត់ផ្គង់ ស្ថេរភាពតម្លៃ និងទីផ្សារកសិផល។
លោក ឆេង ថុង ប្រធានក្រុមប្រឹក្សាភិបាលសហគមន៍កសិកម្មសំបូរមានជ័យបានឱ្យដឹងថា បើកសិករធ្វើកសិកម្មធម្មតា វាមានភាពអវិជ្ជមានមួយចំនួនដូចជា៖ ដាំរៀងខ្លួន គុណភាពផលិតផល ផ្គត់ផ្គង់ទៅដៃគូមិនមានស្តង់ដារ ដូច្នេះធ្វើឱ្យការផ្គត់ផ្គង់អាចធ្វើបានដែរ ប៉ុន្តែបានក្នុងកម្រិតមួយតិច តួច និងមិនមានស្ថេរភាព។
ប្រធានក្រុមប្រឹក្សាភិបាលសហគមន៍កសិកម្មរូបនេះបន្តរៀបរាប់ទៀតថា៖ «ខ្ញុំមើលឃើញថា បើយើងធ្វើកសិកម្មបែបទំនើប ហើយដាំគ្រប់គ្រងរួម ហើយមានកុងត្រាទីផ្សារជាក់លាក់ ហើយមានការជួយជ្រោមជ្រែងពីរដ្ឋាភិបាលទៀត ខ្ញុំគិតថាអាចនឹងជោគជ័យខ្លាំងជាងដែល យើងធ្វើធម្មតា»៕
