គ្រូបង្គោល៖ ជំនាញកែច្នៃចំណីអាហារនឹងក្លាយជាជំនាញមានប្រជាប្រិយភាពនៅពេលអនាគត

ជំនាញកែច្នៃចំណីអាហារ ជាជំនាញដ៏ចាំបាច់មួួយសម្រាប់ជំរុញតម្លៃកសិផលបន្ថែម ជាពិសេស​សម្រាប់ប្រទេសដែលពឹងផ្អែកលើវិស័យកសិកម្មតែម្ដង។ ការកែច្នៃចំណីអាហារក៏ជាវិធីដ៏ល្អបំផុត ក្នុងការឆ្លើយតបទៅនឹងការធ្លាក់ថ្លៃរបស់ដំណាំកសិផលស្រស់។

ថ្វីត្បិតថាប្រជាជនកម្ពុជាមានផ្ទៃដីធ្វើកសិកម្មច្រើន ប៉ុន្តែទំហំនៃការកែច្នៃកសិផលទៅជាផលិតផល អាហារផ្សេងៗ គឺនៅមានកម្រិតតិចតួចនៅឡើយ។ ម្លោះហើយបានជា កសិករជារឿយៗតែងត្អូញត្អែ ពីការតម្លាក់ថ្លៃពីឈ្មួញ ហើយដោយមិនមិនមានជម្រើសអ្វីផ្សេងក៏ត្រូវបង្ខំចិត្តលក់ក្នុងតម្លៃថោក ឬកសិករខ្លះសុខចិត្តទុកកសិផលពួកគេឱ្យស្អុយរលួយចោលតែម្ដង។

ដើម្បីដោះស្រាយបញ្ហានេះ​ រាជរដ្ឋាភិបាលកម្ពុជាក៏បានជំរុញនូវការកែច្នៃក្នុងស្រុកផងដែរ ជាក់ស្ដែង​ដូចជា ការជំរុញការកែច្នៃគ្រាប់ស្វាយចន្ទីសម្រាប់នាំចេញ និងការដាក់ចេញនូវកម្មវិធីបណ្ដុះបណ្ដាល​ជំនាញកែច្នៃចំណីអាហារដោយមិនគិតប្រាក់ជាដើម។

អ្នកនាង ប៉ាង សុភ័ក្រ ដែលជាគ្រូបង្គោលផ្នែកកែច្នៃចំណីអាហារនៅមហាវិទ្យាល័យទេសចរណ៍ និងបដិសណ្ឋារកិច្ច និងដែលបច្ចុប្បន្នកំពុងបង្រៀនសិក្ខាកាមដែលមកពីគ្រួសារក្រីក្រ ក្រោមកម្មវិធី  TVET 1.5M ដោយមិនគិតថ្លៃផងដែរ។

បើតាមគ្រូបង្គោលរូបនេះ បានឱ្យដឹងថា ការបណ្ដុះបណ្ដាលបច្ចុប្បន្នគឺផ្ដោតលើ​ការកែច្នៃផលិតផល​កសិកម្មដែលមាននៅក្នុងស្រុក ហើយកែច្នៃតាមរដូវ​កាល។ ជាក់ស្ដែង ប្រសិនបើដល់រដូវកាលស្វាយ អ្នកនាងនឹងផ្ដោតលើការកែច្នៃភេសជ្ជៈពីស្វាយ ស្រាស្វាយ ដំណាប់ស្វាយ ឬផលិតផលផ្សេង​ទៀត​ដែល​ធ្វើចេញពីស្វាយ។ 

អ្នកនាង ប៉ាង សុភ័ក្រ បានឱ្យដឹងថា រាល់ថ្ងៃនេះយើងផ្ដោតលើការបណ្ដុះបណ្ដាល ការកែច្នៃ​បន្លែផ្លែឈើសិន ដោយសារពួកគាត់មកពីគ្រួសារដែលមិនសូវមានលទ្ធភាព ដូច្នេះចំណេះដឹង​គាត់មានកម្រិត អីចឹងហើយយើងមិនទាន់ដាក់គាត់នៅក្នុងការកែច្នៃកម្រិតខ្ពស់ទេ គឺយើងផ្ដោត​តែទៅលើផលិតផលកសិកម្មទេ ម្យ៉ាងទៀតប្រទេសយើងសម្បូរផលិតផលកសិកម្ម​ស្រាប់។

អ្នកនាងបន្តរំលេចដែរថា៖ «ពីខ្ញុំទៅ ខ្ញុំគិតថាជំនាញនេះមិនពិបាករកការងារធ្វើទេ​ ចប់ផ្នែកនេះទៅ​គាត់​អាច​ទៅធ្វើការនៅតាម រោងចក្រសហគ្រាសបានខ្នាតតូចក្នុងស្រុកយើងក៏បាន ហើយថ្ងៃ​អនាគតទៅប្រសិនបើថ្ងៃមុខទៅ មានរោងចក្រសហគ្រាសធំៗបើកលើការកែច្នៃចំណីអាហារនេះ គាត់អាចទៅធ្វើការបាន។»

ក្រៅតែពីទីផ្សារការងារដែលទូលាយសម្រាប់សិក្ខាកាមក្រោយបញ្ចប់វគ្គបណ្ដុះបណ្ដាលហើយនោះ សិក្ខាកាមខ្លួនឯងក៏អាចយកជំនាញនេះទៅរកស៊ីដោយខ្លួនឯងបានផងដែរ ព្រោះការបណ្ដុះបណ្ដាល គឺធ្វើឡើងដោយផ្ដោតលើការអនុវត្តជាក់ស្ដែង។

គ្រូបង្គោលដដែលនេះបានឱ្យដឹងទៀតថា៖ «ជារួម ទីផ្សារនេះនៅតូចចង្អៀតនៅឡើយ ប៉ុន្តែនៅ​ពេលឆាប់ៗខាងមុខ ការងារគឺមិនខ្វះទេ​ រៀនចប់ភ្លាម គេនឹងបញ្ជូនគាត់ទៅធ្វើការបានតែម្ដង​ ហើយនៅពេលនោះការងារផ្នែកកែច្នៃចំណីអាហារ​ក៏កាន់តែសម្បូរ រីឯវិស័យកសិកម្មរបស់យើង​ក៏នឹងកាន់តែប្រសើរ»៕