ប្រភព៖ BBC, ថ្ងៃសៅរ៍ ទី១៣ ខែមករា ឆ្នាំ២០២៤
ចក្រភពអង់គ្លេស និងសហរដ្ឋអាមេរិក បានការពារសកម្មភាពរបស់ខ្លួនក្នុងការវាយប្រហារប្រឆាំងនឹងក្រុមឧទាមហូទីដែលគាំទ្រដោយអ៊ីរ៉ង់ ជាការសងសឹកទៅនឹងការវាយប្រហាររបស់ក្រុមឧទ្ទាមយេម៉ែនទៅលើកប៉ាល់នៅសមុទ្រក្រហម និងឈូងសមុទ្រ Aden ។
ប្រទេសទាំងពីរទាំងចក្រភពអង់គ្លេស និងសហរដ្ឋអាមេរិក បាននិយាយថា ការវាយប្រហារនេះ គឺស្របច្បាប់ ស្ថិតនៅក្រោមច្បាប់យោធាអន្តរជាតិ។
ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិគឺ លោកស្រី Linda Thomas-Greenfield បានប្រាប់ក្រុមប្រឹក្សាសន្តិសុខអង្គការសហប្រជាជាតិថា ការវាយប្រហារនេះ គឺដើម្បីបង្អាក់ និងបង្ខូចនូវសមត្ថភាពរបស់ក្រុមឧទាមហូទីក្នុងការបន្តការវាយប្រហារដោយមិនប្រុងប្រយ័ត្នប្រឆាំងនឹងនាវា និងការដឹកជញ្ជូនពាណិជ្ជកម្មតាមកប៉ាល់។
លោកស្រី Linda Thomas-Greenfield បានបន្ថែមទៀតថា កប៉ាល់ជាង ២,០០០គ្រឿង ត្រូវបានបង្ខំដោយការវាយប្រហាររបស់ក្រុមឧទាមហូទី ដើម្បីបង្វែរចេញពីសមុទ្រក្រហមចាប់តាំងពីខែវិច្ឆិកាមកម្លេះ។
លោកនាយករដ្ឋមន្ត្រី Rishi Sunak បានទទូចឱ្យចក្រភពអង់គ្លេស និងសហរដ្ឋអាមេរិក ធ្វើសកម្មភាព “ក្នុងការការពារខ្លួន” ហើយថា សម្ព័ន្ធមិត្តនឹងមិនស្ទាក់ស្ទើរក្នុងការធានាសុវត្ថិភាពនៃការដឹកជញ្ជូនពាណិជ្ជកម្មតាមកប៉ាល់នោះទេ៕
