ចាប់ខ្លួនជនជាតិវៀតណាម២នាក់ដកហូតគ្រឿងញៀនជាង៩គីឡូក្រាមនៅក្រុងបាវិត

ខេត្តស្វាយរៀង ៖ កម្លាំងកងរាជអាវុធហត្ថ ខេត្តស្វាយរៀងបានធ្វើការបង្ក្រាបករណីជួញដូរ គ្រឿងញៀន និង ដកហូតគ្រឿងញៀនបានជាង ៩ គីឡូក្រាម និង ឃាត់ខ្លួនជនសង្ស័យជាជនជាតិ វៀតណាមចំនួន ២ នាក់ ដើម្បីបញ្ជូនទៅសាលាដំបូង ខេត្តស្វាយរៀងចាត់ការតាមផ្លូវច្បាប់កាលពី ថ្ងៃ ទី ៩ ខែកញ្ញា ឆ្នាំ ២០២៤ ។

បើតាមមន្ត្រីកងរាជអាវុធហត្ថខេត្តស្វាយរៀងបានឲ្យ ដឹង ថាដោយអនុវត្តបទបញ្ជាដ៏ម៉ឺងម៉ាត់របស់លោកឧត្តមសេនីយ៍ត្រី សុខា រ៉ា នាថ មេបញ្ជាការ កងរាជអាវុធហត្ថ ខេត្តស្វាយរៀង និង ដោយមានការសម្របសម្រួលនីតិវិធីពីលោកឡាយជុងហេងព្រះរាជអាជ្ញារងនៃអយ្យការ អមសាលាដំបូង ខេត្តស្វាយរៀង នៅ វេលា ម៉ោង ១៥ និង ៣០ នាទីរហូតដល់វេលាម៉ោង១៨ និង ១៥ នាទី ថ្ងៃ ទី ០៤ ខែកញ្ញាឆ្នាំ២០២៤ កម្លាំងជំនាញកងរាជអាវុធហត្ថ ខេត្តស្វាយរៀង ដឹកនាំដោយលោកវរសេនីយ៍ឯក ស្រី វុ ត្ថា មេបញ្ជាការរងកងរាជអាវុធហត្ថ ខេត្តស្វាយរៀង បានចុះបង្ក្រាបករណីរក្សាទុកឬជួញដូរនិងប្រើប្រាស់ ដោយខុសច្បាប់នូវសារធាតុញៀននៅចំណុចផ្ទះសំណាក់ ហេង ហេង ស្រី រ័ត្ន ស្ថិតនៅភូមិបាវិត កណ្ដាល សង្កាត់បាវិត ក្រុងបាវិត និងនៅបុរី ចន្ទ រាជ ផ្ទះ ជួល លេខ A11 ស្ថិតនៅភូមិតាបឹប សង្កាត់បាវិត ក្រុង បាវិត ខេត្តស្វាយរៀង ដោយឃាត់ខ្លួនជនសង្ស័យ ជា ជនជាតិវៀតណាមចំនួន២នាក់ ។

មន្ត្រីអាវុធហត្ថដដែលបានបញ្ជាក់ថាក្នុងប្រតិបត្តិការ បង្ក្រាបគ្រឿងញៀននេះសមត្ថកិច្ចបានដកហូតយកវត្ថុ តាងរួមមាន ៖ ថ្នាំញៀនក្រាមពណ៌សថ្លាចំនួន ១៧ កញ្ចប់ មានទម្ងន់ ៩,៣០៦.៥០ ក្រាម( មេតំហ្វេតាមីន ) ម្សៅ កញ្ចប់ពណ៌ក្រហមសញ្ញារូបសេះចំនួន ០៣ កញ្ចប់ ទម្ងន់ ៥៥.៩០ ក្រាម ( អិចស្ត្រាស៊ី ) ថ្នាំគ្រាប់ពណ៌ផ្កាឈូក ចំនួន ០១ កញ្ចប់ទម្ងន់ ២.៣០ ក្រាម ( អិចស្ត្រាស៊ី ) ថ្នាំ គ្រាប់ពណ៌ត្រួយចេកចំនួន ០៥ កញ្ចប់ មានទម្ងន់ ៤៣.០០ ក្រាម ( អិ ចស្ត្រាស៊ី ) ថ្នាំគ្រាប់ពណ៌បៃតង ចំនួន ០១ កញ្ចប់មានទម្ងន់ ៣.៦០ ក្រាម ( អិចស្ត្រាស៊ី ) ថ្នាំគ្រាប់ពណ៌ក្រហមចំនួន០៤កញ្ចប់ទម្ងន់ ៥១.៨០ ក្រាម ( មេតំហ្វេតាមីន ) ថ្នាំម្សៅម៉តពណ៌សចំនួន០២ កញ្ចប់ ទម្ងន់ ៦.៦០ ក្រាម ( កេតាមីន ) ថ្នាំគ្រាប់ពណ៌ខៀវ ចំនួន ០១ កញ្ចប់មានទម្ងន់ ១.១០ ក្រាម ( អិ ចស្ត្រាស៊ី ) ។ ទម្ងន់ថ្នាំញៀនសរុបចំនួន ៩,៤៧០.៨០ ក្រាម ។

សមត្ថកិច្ចបានដកហូតម៉ូតូចំនួន ០១ គ្រឿង ទូរសព្ទដៃ ចំនួន ០៣ គ្រឿង ប័ណ្ណបើករថយន្ដ ចំនួន ០១ សន្លឹក សៀវភៅបើកបររថយន្ដ ចំនួន ០១ ក្បាល ឧបករណ៍ សម្រាប់ កិន គ្រឿងញៀន ចំនួន ០១ គ្រឿង គ្រាប់ កាំភ្លើងខ្លី ០១ គ្រាប់ អាវុធ ខ្លី ម៉ាក់ រ៉ូ ឡូ ០១ ដើម ពូថៅ តូច ០១ ដុំ រ៉ូ ឡូ កាំភ្លើងខ្លី ០១ កាបូប ពណ៌ ខ្មៅ ០១ ជញ្ជីង សម្រាប់ ថ្លឹង គឿ ង ញៀន ចំនួន ០៣ គឿ ង ប័ណ្ណបើកបរ ចំនួន ០១ ក្បាល លិខិតឆ្លងដែន ចំនួន ០១ ក្បាល សម្ភារៈវិចខ្ចប់ និងសម្ភារប្រើប្រាស់គ្រឿងញៀន មួយចំនួនផងដែរ ។

បច្ចុប្បន្នជនសង្ស័យនិងវត្ថុតាងត្រូវបញ្ជូនទៅ សាលាដំបូងខេត្តស្វាយរៀងនិងលោកចៅក្រមបាន ចេញដីការឃុំខ្លួនបណ្តោះអាសន្ននៅពន្ធនាគារ ខេត្តស្វាយរៀងរួចហើយ ៕