ប្រទេសកាតាបានចំណាយពេលជាច្រើនខែក្នុងព្យាយាមបន្ធូរបន្ថយភាពតានតឹង ដែលចេះតែកើនឡើងនៅក្នុងតំបន់ហ្គាហ្សា ដោយធ្វើជាម្ចាស់ផ្ទះក្នុងកិច្ចពិភាក្សារវាងអ៊ីស្រាអែល និង ក្រុមហាម៉ាស់ ដើម្បីទទួលបាននូវការដោះលែងចំណាប់ខ្មាំង និង ឈានដល់បទឈប់បាញ់។ ទោះជាយ៉ាងណាក៏ដោយ មេដឹកនាំនៃប្រទេសនេះ បានទទួលស្គាល់ថា កិច្ចចរចារនេះ គឺស្ថិតក្នុងស្ថានភាពស្ទើរតែជាប់គាំង។
នាយករដ្ឋមន្ត្រីនៃប្រទេសកាតា ព្រះអង្គម្ចាស់ Mohammed bin Abdulrahman Al-Thani បានមានព្រះរាជបន្ទូលថា ក្រុមហាម៉ាស់ចង់ឱ្យមានការឈប់ច្បាំងគ្នាជាមុនសិន មុននឹងនិយាយអំពីចំណាប់ខ្មាំង។ ព្រះអង្គម្ចាស់ទ្រង់បានមានព្រះរាជបន្ទូលបន្ថែមទៀតថា អ៊ីស្រាអែលមានគំនិតខុសពីក្រុមហាម៉ាស។
ព្រះអង្គម្ចាស់ទ្រង់បានមានព្រះរាជបន្ទូលថា ដរាបណាមិនមានភាពសាមញ្ញរវាងរឿងទាំងពីរនោះទេ នោះវានឹងមិនធ្វើឱ្យយើងទទួលបានលទ្ធផលអ្វីនោះឡើយ។
ព្រះអង្គម្ចាស់ក៏បានមានព្រះរាជបន្ទូលផងដែរថា ការវាយប្រហាររបស់អ៊ីស្រាអែលនៅក្នុងទីក្រុង Rafah ភាគខាងត្បូង បានធ្វើឱ្យកិច្ចពិភាក្សា ដើរថយក្រោយ។
កងកម្លាំងការពារជាតិអ៊ីស្រាអែលបាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ក្នុងរយៈពេលមួយថ្ងៃកន្លងមកនេះ ពួកគេបានវាយប្រហារលើគោលដៅជាង១០០គោលដៅនៅទូទាំងតំបន់ហ្គាហ្សា និង បានកម្ចាត់យុទ្ធជនហាម៉ាស់រាប់សិបនាក់។
ទូរទស្សន៍ Al Jazeera រាយការណ៍ថា ការវាយប្រហារតាមផ្លូវអាកាសនៅកណ្តាលទីក្រុង Nuseirat បានវាយប្រហារអគារលំនៅដ្ឋានមួយ ដោយបានសម្លាប់មនុស្សយ៉ាងហោចណាស់៤០នាក់ រួមទាំងកុមារផងដែរ។
អ្នកស្រុកនៅតំបន់ហ្គាហ្សាកំពុងតស៊ូ ដើម្បីទទួលបាននូវការថែទាំសុខភាព ដែលពួកគេត្រូវការជាបន្ទាន់។ គណៈកម្មាធិការអន្តរជាតិនៃកាកបាទក្រហមបាននិយាយកាលពីថ្ងៃអង្គារថា ខ្លួនបានបើកមន្ទីរនៅទីក្រុង Rafah កាលពីថ្ងៃទី៩ ឧសភា ខែឧសភា។ ខ្លួនបាននិយាយថា មន្ទីពេទ្យនេះអាចព្យាបាលមនុស្សប្រហែល២០០នាក់ក្នុងមួយថ្ងៃ។
ក្រុមមន្ត្រីបានជម្រុញឱ្យគ្រប់ភាគីពាក់ព័ន្ធក្នុងជម្លោះទាំងអស់ ឱ្យគោរព និង ការពារបេសកកម្មវេជ្ជសាស្រ្ដ៕ ប្រភព៖ NHK
