អ្នកឆ្លើយឆ្លងទីភ្នាក់ងារសារព័ត៌មានរុស្ស៊ី TASS បានធ្វើសេចក្តីរាយការណ៍ពីកន្លែងកើតហេតុឱ្យដឹងថា ប៉ូលីសកុប្បកម្មជាច្រើននាក់ បានចាប់ផ្តើមធ្វើការឃាត់ខ្លួនបាតុករ ដែលតវ៉ាប្រឆាំងទៅនឹងច្បាប់ភ្នាក់ងារបរទេសនៅជិតអគារសភាក្នុងទីក្រុង Tbilisi។
ស្ថានភាពនៅកន្លែងកើតហេតុ មិនមានការផ្លាស់ប្តូរនោះទេ បាតុកររាប់សិបនាក់នៅតែស្នាក់នៅមុខអគារសភា ខណៈពេលដែលប៉ូលិស ត្រូវបានដាក់ពង្រាយជុំវិញកន្លែងធ្វើបាតុកម្មនោះ។
កាលពីល្ងាចថ្ងៃពុធ មនុស្សរាប់ពាន់នាក់បានប្រមូលផ្តុំគ្នា ធ្វើបាតុកម្មនៅខាងក្រៅអគារសភាក្នុងទីក្រុង Tbilisi។ ការជួបជុំធ្វើបាតុកម្មនោះ បានក្លាយទៅជាការប៉ះទង្គិចជាមួយប៉ូលិស។ បាតុករខ្លះបានចូលទៅជិតបុគ្គលិកច្រកចូលនៃអគារសភា ហើយចាប់ផ្តើមយោគទ្វាររបង។ ប៉ូលិសកុបកម្មប្រចាំការនៅទីនោះ បានឆ្លើយតបដោយបាញ់ឧស្ម័នបង្ហូរទឹកភ្នែក ឧស្ម័នម្រេច និង ប្រើយន្តហោះបាញ់ទឹក។ ដុំថ្ម ដប និងផាវ ត្រូវបានគប់ដាក់ទៅលើប៉ូលិស។
កាលពីថ្ងៃទី១ ខែឧសភា សភាហ្សកហ្ស៊ី បន្ទាប់ពីការអានលើកទីពីរ បានគាំទ្រសេចក្តីព្រាងច្បាប់ស្តីពីតម្លាភាពនៃឥទ្ធិពលបរទេស ដែល លោកស្រី Zourabichvili ជំទាស់ថា ជាឧបសគ្គដល់ការធ្វើសមាហរណកម្មរបស់ប្រទេសទៅក្នុងសហភាពអឺរ៉ុប។ គណបក្សប្រឆាំង និង សកម្មជនស៊ីវិល បានធ្វើការប្រមូលផ្តុំគ្នាប្រឆាំងទៅនឹងច្បាប់នេះ នៅក្នុងទីក្រុង Tbilisi ចាប់តាំងពីថ្ងៃទី១៥ ខែមេសា។
គណបក្ស Georgian Dream-Democratic Georgia Party ដែលជាគណបក្សកាន់អំណាច បានប្រកាសកាលពីដើមខែមេសានេះថា គណៈបក្សខ្លួនបានសម្រេចចិត្តដាក់បញ្ចូលឡើងវិញនូវច្បាប់នេះទៅកាន់សភា។ រឿងនេះ បានកើតឡើងមួយឆ្នាំ បន្ទាប់ពីគំនិតផ្តួចផ្តើមស្រដៀងគ្នានេះ បានបង្កឱ្យមានការតវ៉ាដ៏ធំ ដោយបង្ខំឱ្យអាជ្ញាធរបោះបង់ចោលច្បាប់នេះ។ អត្ថបទរបស់ខ្លួននៅតែដូចគ្នាទៅនឹងឆ្នាំមុនដដែល លើកលែងតែពាក្យ “ភ្នាក់ងារនៃឥទ្ធិពលបរទេស”។ ផ្ទុយទៅវិញ ពាក្យ “អង្គការលើកកម្ពស់ផលប្រយោជន៍របស់មហាអំណាចបរទេស” ត្រូវបានប្រើប្រាស់៕ ប្រភព៖ TASS
