ប្រធានាធិបតីនៃប្រទេសអ៊ីរ៉ង់ លោក Ebrahim Raisi បានរំលឹកឡើងវិញនូវការរិះគន់យ៉ាងចាស់ដៃរបស់លោកទៅលើប្រទេសអ៊ីស្រាអែល និង សហរដ្ឋអាមេរិកជុំវិញជម្លោះនៅតំបន់ ហ្គាហ្សា ស្ទ្រីប។
លោក Raisi ថ្លែងសុន្ទរកថានៅក្នុងរដ្ឋធានីតេហេរ៉ង់កាលពីថ្ងៃអាទិត្យ ដើម្បីរំលឹកខួបលើកទី៤៥នៃបដិវត្តអ៊ីស្លាម។
លោក Raisi បាននិយាយថា ប្រសិនបើប្រជាជនចង់ស្គាល់ប្រទេសអ៊ីស្រាអែល និង សហរដ្ឋអាមេរិក ពួកគេគួរតែឃើញឧក្រិដ្ឋកម្មសង្រ្គាមប្រឆាំងនឹងប្រជាជនប៉ាឡេស្ទីន។ លោកបាននិយាយថា ឥឡូវនេះសហរដ្ឋអាមេរិកគឺអ្នកជួយសង្គ្រោះចំពោះឧក្រិដ្ឋកម្មទាំងនោះ។
លោក Raisi ក៏បាននិយាយផងដែរថា ប្រទេសលោកខាងលិច បានធ្វើរឿងជាច្រើន ដើម្បីរារាំងប្រទេសអ៊ីរ៉ង់ពីការគាំទ្រប៉ាឡេស្ទីន ក៏ប៉ុន្តែបញ្ហាប៉ាឡេស្ទីនគឺជាអាទិភាពទីមួយនៃពិភពលោកនៃសាសនាឥស្លាម។
ប្រទេសអ៊ីរ៉ង់បានកំពុងគាំទ្រក្រុមឥស្លាមហាម៉ាស និង ក្រុមសកម្មប្រយុទ្ធផ្សេងទៀត។
ហ្វូងពលរដ្ឋបានប្រមូលផ្តុំគ្នានៅទីលាននានា ហើយបានដើរតាមដងផ្លូវនៅទូទាំងប្រទេសអ៊ីរ៉ង់ ដើម្បីប្រារព្ធខួបលើកទី៤៥នៃបដិវត្តន៍ឥស្លាម ដោយពួកគេខ្លះកាន់ទង់ជាតិប៉ាឡេស្ទីន។
បដិវត្តន៍ឆ្នាំ១៩៧៩ បាននាំទៅដល់ការផ្តួលរំលំរាជវង្ស Pahlavi ដែលគាំទ្រដោយសហរដ្ឋអាមេរិក និង សាធារណរដ្ឋឥស្លាមអ៊ីរ៉ង់បច្ចុប្បន្ន ដែលត្រូវបានគ្រប់គ្រងដោយអ្នកប្រាជ្ញច្បាប់ឥស្លាម។
ចាប់តាំងពីពេលនោះមក ប្រទេសអ៊ីរ៉ង់បានប្រកាន់យកគោលនយោបាយប្រឆាំងនឹងសហរដ្ឋអាមេរិកយ៉ាងតឹងរ៉ឹង។ ហើយក៏បានយកប្រទេសអ៊ីស្រាអែលជាសត្រូវរបស់ខ្លួនផងដែរ ខណៈដែលប្រទេសអ៊ីស្រាអែលបន្តកាន់កាប់ទីក្រុងហ្សេរុយសាឡឹម ដែលរួមមានកន្លែងពិសិដ្ឋដ៏សំខាន់របស់សាសនាឥស្លាម។
ប្រភព៖ NHK, ថ្ងៃចន្ទ ទី១២ ខែកុម្ភៈ ឆ្នាំ២០២៤
