ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី បាននិយាយកាលពីថ្ងៃអាទិត្យម្សិលមិញថា យ៉ាងហោចណាស់ទាហានអ៊ុយក្រែន ៣១.០០០នាក់ បានស្លាប់នៅក្នុងសង្គ្រាមជាមួយនឹងប្រទេសរុស្ស៊ី។
លោក ហ្សេឡេនស្គី បានជំទាស់នឹងការទាមទាររបស់ប្រទេសរុស្ស៊ី ដែលមានចំនួនខ្ពស់ជាងនេះ នៅពេលនិយាយអំពីជនរងគ្រោះអ៊ុយក្រែន។ ប្រធានាធិបតីអ៊ុយក្រែនក៏បាននិយាយដែរថា ជនស៊ីវិលរាប់ម៉ឺននាក់នៅតំបន់កាន់កាប់នៅក្នុងប្រទេសត្រូវបានសម្លាប់។
ទូរទស្សន៍ ស៊ីអិនអិន មិនអាចផ្ទៀងផ្ទាត់ចំនួនអ្នកស្លាប់ទាំងនេះដោយឯករាជ្យបានទេ។ ការខាតបង់នៅសមរភូមិអ៊ុយក្រែន គឺនៅតែជាអាថ៌កំបាំង ដែលត្រូវបានការពារយ៉ាងដិតដល់ ប៉ុន្តែមន្ត្រីសហរដ្ឋអាមេរិកប៉ាន់ស្មានថា ទាហានប្រហែល ៧០,០០០នាក់ ត្រូវបានសម្លាប់ ជិតពីរដងនៃចំនួននេះ រងរបួស។
បរិបទខ្លះ៖ ពេញមួយជម្លោះ ទីក្រុងគៀវមានការស្ទាក់ស្ទើរក្នុងការទទួលស្គាល់ថា តើទាហានប៉ុន្មាននាក់ ត្រូវបានសម្លាប់។ អតីតរដ្ឋមន្ត្រីការពារជាតិអ៊ុយក្រែន លោក Oleksii Reznikov បាននិយាយនៅក្នុងខែមិថុនា ឆ្នាំ២០២២ ថា លោកជឿជាក់ថា ជនជាតិអ៊ុយក្រែនរាប់ម៉ឺននាក់ ត្រូវបានសម្លាប់ ចាប់តាំងពី ខែកុម្ភៈនៃឆ្នាំនោះ។ ប៉ុន្តែពីរខែក្រោយមក លោក Valerii Zaluzhnyi ដែលកាលនោះជាប្រមុខកងកម្លាំងប្រដាប់អាវុធអ៊ុយក្រែន បាននិយាយថា ទាហាន៩,០០០នាក់ ត្រូវបានសម្លាប់។
ប្រភពដែលដឹងពីការវាយតម្លៃស៊ើបការណ៍សម្ងាត់របស់សហរដ្ឋអាមេរិក ដែលត្រូវបានផ្តល់ឱ្យសភាបានប្រាប់ទូរទស្សន៍ ស៊ីអិនអិន កាលពីខែធ្នូថា ជាមួយគ្នានេះដែរ ប្រទេសរុស្ស៊ីបានបាត់បង់ ៨៧% នៃកងទ័ពជើងគោក ដែលបំពេញកាតព្វកិច្ចសកម្ម ដែលខ្លួនមានមុនពេលការឈ្លានពាន៕
ប្រភព៖ CNN, ថ្ងៃអាទិត្យ ទី២៥ ខែកុម្ភៈ ឆ្នាំ២០២៤
