ព្រឹត្តិការណ៍នៃការប្រកួតកីឡាវាយកូនបាល់ពិភពលោក Davis Cup Asia/Oceania Group IV ( គ្រុបទី៤) ឆ្នាំ២០២៤ បានបើកជាផ្លូវការហើយ ក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងជាកីឡាអគ្គលេខាធិការគណៈកម្មាធិការជាតិអូឡាំពិកកម្ពុជា នាព្រឹកថ្ងៃទី ១០ ខែកក្កដា ឆ្នាំ២០២៤ នៅពហុកីឡដ្ឋានជាតិមរតកតេជោ។
លទ្ធផលនៃការចាប់ឆ្នោតបែងចែកពូលនៃការប្រកួតប្រកួតកីឡាវាយកូនបាល់ពិភពលោកក្រុមទី៤ Davis Cup 2024 បានបែងចែករួចហើយ។
បើយោងតាមលទ្ធផលនៃការចាប់ឆ្នោតបែងចែកពូល កាលពីរសៀលថ្ងៃទី០៩ ខែកក្កដា ឆ្នាំ២០២៤ នៅពហុកីឡដ្ឋានជាតិមរតកតេជោ គេសង្កេតឃើញថា ក្រុមម្ចាស់ផ្ទះកម្ពុជា ស្ថិតនៅពូល B ជាមួយ គុយវ៉ែត អ៊ីរ៉ាក់ និងមីយ៉ាន់ម៉ា ខណៈពូល A មាន ប្រទេសកៀហ្ស៊ីស៊ីស្ថាន ស្រីលង្កា អារ៉ាប់រួម និងកាតា។
ក្នុងថ្ងៃប្រកួតបើឆាកនេះ កីឡាករវាយកូនបាល់កម្ពុជា ប៊ុន កេន្នី បានប្រកួតយកឈ្នះកីឡាករអ៊ីរ៉ាក់ 𝗦𝗮𝗶𝗱𝗶 𝗔𝗱𝗲𝗹 ក្នុងលទ្ធផល ២ សិតទល់នឹង ០ ដោយ សិតទី១ យកឈ្នះ ៦-១ និងសិតទី២ យកឈ្នះដោយមិនឱ្យតដៃ បាន ៦-០ ដោយចំណាយថេរវេលា ១ម៉ោង ២២នាទី៕
