កាលពីថ្ងៃពុធ ទី២៦ ខែ មិថុនា ឆ្នាំ២០២៤ យប់មិញនេះ ក្រុមបញ្ចខែលព័រទុយហ្គាល់ បានបរាជ័យយ៉ាងអាម៉ាស់ក្រោមថ្វីជើង ក្រុមជម្រើសជាតិហ្សកហ្ស៊ី ក្នុងលទ្ធផល ២-០ ក្នុងការប្រកួតសន្សំពិន្ទុក្នុងពូលជុំចុងក្រោយ Euro 2024។
គ្រាប់បាល់ជ័យជំនះ របស់ ហ្សកហ្ស៊ី រកបានដោយកីឡាករ Khvicha Kvaratskhelia នៅនាទីទី២ និងការស៊ុតបាល់ប៉េណាល់ទីរបស់ Georges Mikautadze នៅនាទីទី៥៧។ តាមរយៈលទ្ធផលនេះ បានជួយឲ្យ ហ្សកហ្ស៊ី ឡើងទៅកាន់វគ្គ១៦ក្រុមចុងក្រោយ ក្នុងនាមជាក្រុមលេខ៣ ល្អក្នុងពូល F ខណៈព័រទុយហ្គាល់ និងទួកគី ឈរលេខ១ និងលេខ២ ឡើងទៅវគ្គបន្តដោយស្វ័យប្រវត្តិ។
គួរបញ្ជាក់ថា គិតមកទល់ពេលនេះ គេបានរកឃើញជើងខ្លាំងទាំង១៦ប្រទេស ដែលកក់កៅអីទៅកាន់វគ្គ១៦ក្រុមចុងក្រោយហើយ ក្នុងការប្រកួតពានរង្វាន់ Euro 2024 ដែលរៀបចំឡើងក្នុងប្រទេសអាល្លឺម៉ង់។
សម្រាប់ក្រុមទាំង១៦ ដែលបានកក់កៅអីទៅកាន់វគ្គបន្ទាប់នេះ រួមមាន៖ ក្រុមឥន្រ្ទីដែកអាល្លឺម៉ង់, ក្រុមតោកំណាចអង់គ្លេស, ក្រុមគោជល់អេស្ប៉ាញ,ក្រុមមាន់គោកបារាំង,ក្រុមបញ្ចខែលព័រទុយហ្គាល់, អ៊ីតាលី, ស្វីស, ដាណឺម៉ាក, អូទ្រីស, ស្លូវេនា, បែលហ្សិក, ស្លូវ៉ាគី, រ៉ូម៉ានី, ហ្សកហ្ស៊ី, ទួកគី និង ហូឡង់។
គួរបញ្ជាក់ថា ក្រុមដែលលើកពានរង្វាន់នេះច្រើនជាងគេ គឺក្រុមជម្រើសជាតិអាល្លឺម៉ង់ និងអេស្ប៉ាញ ដោយឈ្នះម្នាក់ ៣ដង ខណៈ អ៊ីតាលី និងបារាំង ឈ្នះម្នាក់ ២ដង។ ក្នុងឆ្នាំនេះ ក្រុមជម្រើសជាតិ អុីតាលី ជាក្រុមការពារតំណែងជើងឯក៕
