រដ្ឋមន្ត្រីហិរញ្ញវត្ថុ និង ទេសាភិបាលធនាគារកណ្តាលមកពីក្រុមប្រទេសចំនួនជី២០ បានប្រមូលផ្តុំគ្នារយៈពេលពីរថ្ងៃនៃកិច្ចប្រជុំនៅទីក្រុង សៅ ប៉ូឡូ នៃប្រទេសប្រេស៊ីល។
រដ្ឋមន្ត្រីហិរញ្ញវត្ថុប្រេស៊ីល លោក Fernando Haddad បានស្វាគមន៍អ្នកចូលរួមនៅក្នុងកិច្ចប្រជុំកាលពីថ្ងៃពុធ ដោយនិយាយថា ប្រទេសជី២០ គឺជាវេទិកា ដែលពួកគេអាចសម្របសម្រួលគោលនយោបាយសេដ្ឋកិច្ចប្រកបដោយប្រសិទ្ធភាពរហូតទាល់តែកិច្ចខិតខំប្រឹងប្រែងរបស់ពួកគេ “កើនឡើង” ។
លោកបាននិយាយថា វាដល់ពេលដែលត្រូវ “កំណត់ឡើងវិញនូវសកលភាវូបនីយកម្ម” រួមបញ្ចូលការវិនិយោគមិនត្រឹមតែដើម្បីរកប្រាក់ចំណេញប៉ុណ្ណោះទេ ប៉ុន្តែថែមទាំងគោរពគោលការណ៍សង្គម និង បរិស្ថានផងដែរ។ លោកបានបន្ថែមថា ប្រទេសប្រេស៊ីលចង់ផ្តោតការពិភាក្សាលើការប្រយុទ្ធប្រឆាំងនឹងភាពក្រីក្រ និងការប្រែប្រួលអាកាសធាតុ។
ទោះជាយ៉ាងណាក៏ដោយ អ្នកដែលនៅជុំវិញតុមួយចំនួនបានយល់ឃើញថា ភាពតានតឹងភូមិសាស្ត្រនយោបាយពិបាកទុកមួយឡែក។ ពួកគេបានពិនិត្យមើលការប្រយុទ្ធគ្នាក្នុងប្រទេសអ៊ុយក្រែន និង ឥទ្ធិពលរបស់វាមកលើសន្តិសុខស្បៀង និង ថាមពល។
អ្នកខ្លះដែលគាំទ្រប្រទេសអ៊ុយក្រែនបានជជែកដេញដោលគ្នាថាតើ ត្រូវប្រើលុយពីទ្រព្យសកម្មរបស់ប្រទេសរុស្ស៊ី ដែលពួកគេបានបង្កកនៅបរទេស ដើម្បីផ្តល់មូលនិធិដល់កិច្ចប្រឹងប្រែងសង្គ្រាមរបស់ប្រទេសអ៊ុយក្រែន។ រដ្ឋមន្ត្រីក្រសួងហិរញ្ញវត្ថុរុស្ស៊ី លោក Anton Siluanov បានព្រមានថា ការរឹបអូសបែបនេះ នឹងធ្វើឱ្យខូចដល់ប្រព័ន្ធហិរញ្ញវត្ថុអន្តរជាតិ។
អ្នកចូលរួមក្នុងកិច្ចប្រជុំក៏បាននិយាយការរីករាលដាលពីការប្រយុទ្ធគ្នានៅតំបន់ហ្គាហ្សា រួមទាំងការវាយប្រហារលើការដឹកជញ្ជូនទំនិញក្នុង និង ជុំវិញសមុទ្រក្រហម។ ពួកគេបារម្ភថា ជម្លោះអាចនឹងបន្តអូសបន្លាយ ដោយឥទ្ធិពលមហន្តរាយសម្រាប់សេដ្ឋកិច្ចពិភពលោក៕
ប្រភព៖ NHK, ថ្ងៃពុធ ទី២៩ ខែកុម្ភៈ ឆ្នាំ២០២៤
