រថយន្ដធុនធំបុកកិនពីលេីបុរសម្នាក់ស្លាប់ភ្លាមៗ ចំណែករថយន្តបង្កបានបន្ថែមល្បឿនបើកគេចបាត់ស្រមោល

ភ្នំពេញ៖ ហេតុការណ៍នេះបានកើតឡើងកាលពីម៉ោង 12:30នាទីរំលងអធ្រាត្រឈានចូលថ្ងៃទី២១ ខែកក្កដា ឆ្នាំ ២០២៤ នៅតាមបណ្ដោយផ្លូវសម្ដេចជាស៊ីម ក្នុងសង្កាត់គោកឃ្លាង ខណ្ឌសែនសុខ រាជធានីភ្នំពេញ។ បុរសម្នាក់បានស្លាប់នៅនឹងកន្លែងកេីតហេតុ ខណៈបេីកម៉ូតូតាមផ្លូវត្រូវរថយន្ដធុនធំបុកកិនពីលេី ចំណែករថយន្តបង្កបានបន្ថែមល្បឿនបើកគេចបាត់ស្រមោល ។
សមត្ថកិច្ចបានឲ្យដឹងថា សពជនរងគ្រោះមានឈ្មោះ ហ៊ន សុផាន់ ភេទប្រុស អាយុ 22ឆ្នាំ។

នៅមុនពេលកើតហេតុគេឃើញបុរសម្នាក់ បេីកម៉ូតូមួយគ្រឿងម៉ាកឌ្រីមសង់ពណ៌ខ្មៅ ពាក់ស្លាកលេខកំពង់ចាម 1W-2711 ធ្វើដំណើរតាមបណ្តោយផ្លូវសម្ដេចជាស៊ីម ក្នុងទិសដៅពីលិចមកកើត ខណៈមកដល់ចំណុចកើតហេតុ ស្រាប់តែមានរថយន្តកុងតឺន័រមួយគ្រឿងមិនចាំស្លាកលេខ បើកក្នុងទិសដៅបញ្ច្រាសគ្នា មកបុកម៉ូតូពេញទំហឹង បណ្ដាលឱ្យអ្នកបើកម៉ូតូស្លាប់ភ្លាមនៅនឹងកន្លែងកើតហេតុ។ ក្រោយកើតហេតុ រថយន្ដមិនបាននៅឈប់ទេដោយបេីករត់គេចបាត់ស្រមោល។

សមត្ថកិច្ចជំនាញបានចុះមកដល់ធ្វើកំណត់ហេតុប្រគល់សពឲ្យក្រុមគ្រួសារយកទៅធ្វើបុណ្យតាកប្រពៃណី និងស្រាវជ្រាវរករថយន្តបង្កយកមកចាត់ការបន្តតាមនីតិវិធីច្បាប់ ៕