របួសធ្ងន់ស្រាលជាច្រើននាក់ក្នុងគ្រោះថ្នាក់ចរាចរណ៍ ម៉ូតូ និង ម៉ូតូសណ្តោងរ៉ឺម៉កដឹកផ្កាឈូកបុកគ្នា

(ព័ត៌មានបឋម)៖ នៅថ្ងៃពុធ ១៤កើត ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃពុធ ទី២៤ ខែមករា ឆ្នាំ២០២៤ មានគ្រោះថ្នាក់ចរាចរណ៍ដ៏គួរឱ្យរន្ធត់មួយបានកើតឡើងរវាង ម៉ូតូឌ្រីមសង់ស៊េរី២០២២ ពណ៌ស ពាក់ស្លាកលេខ ភ្នំពេញ 1JP-5801 ជិះដោយយុវជនមានគ្នា២នាក់ និង ម៉ូតូសណ្តោងរ៉ឺម៉កដឹកផ្កាឈូក មិនស្គាល់ស្លាកលេខ ជិះគ្នា៣នាក់ បណ្តាលឱ្យយុវជន២នាក់បាក់ជើង អ្នកបើកម៉ូតូសណ្តោងរ៉ឺម៉ករងរបួសស្រាលត្រង់ជើង និងស្ត្រីដែលរួមដំណើតរនៅលើរ៉ឺម៉ករងរបួសត្រង់ឆ្អឹងជំនី។ ចំណែកឯម៉ូតូសណ្តោងរ៉ឺម៉ក១គ្រឿងដាច់ក ហើយផ្ទប់ជាប់គ្នាជាមួយនឹងម៉ូតូឌ្រីមសង់។ ក្រោយពេលកើតហេតុយុវជនទាំង២នាក់ ត្រូវបានរថយន្តមន្ទីពេទ្យដឹកចេញទៅ ដើម្បីជួយសង្គ្រោះបន្ទាន់ និងព្យាបាល។

ហេតុការគ្រោះថ្នាក់ចរាចរណ៍លើនេះ បានកើតឡើងនៅវេលាម៉ោងជិត៤ទៀបភ្លឺ តាមបណ្តោយផ្លូវម៉ៅសេទុង កែង១៩៩ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។ ចំពោះព័ត៌មានលម្អិតនៃគ្រោះថ្នាក់នេះ មិនទាន់បានដឹងនៅឡើយទេ៕