វិសាខា សាងប្រវត្តិសាស្រ្តថ្មី ក្លាយជាក្លិបបាល់ទះកម្ពុជាដំបូងគេលើកពាននៅក្រៅប្រទេស

(បាល់ទះ)៖ កាលពីយប់ថ្ងៃអាទិត្យ ទី២ ខែមិថុនា ឆ្នាំ២០២៤ ក្រុមបាល់ទះសេះមាសវិសាខា បានបង្កើតប្រវត្តិសាស្រ្តថ្មីមួយជូនកម្ពុជា ដោយក្លាយជាក្លិបកម្ពុជាដំបូងគេបានឈ្នះជើងឯកនៅក្រៅប្រទេស ក្រោយឈ្នះពានរង្វាន់ Win+ Streak Volleyball Invitational Tournament នៅតៃវ៉ាន់។

កាលពីម្សិលមិញនេះ ក្រុមបាល់ទះវិសាខា សងសឹកក្រុមម្ចាស់ផ្ទះបានសម្រេចដោយបំបាក់ក្រុម Win Streak ក្នុងលទ្ធផល ៣សិតទល់នឹង ១ នៅក្នុងវគ្គផ្ដាច់ព្រ័ត្រ។

លទ្ធផល៖
-សិត១៖ វិសាខា ២៥-២៣ Win Streak
-សិត២៖ វិសាខា ២៣-២៥ Win Streak
-សិត៣៖ វិសាខា ២៥-២៣ Win Streak
-សិត៤៖ វិសាខា ២៥-២២ Win Streak ។

គួររំលឹកថា ក្នុងវគ្គសន្សំពិន្ទុក្នុងពូល B ក្រុមវិសាខា បានប្រកួតចាញ់ក្រុមម្ចាស់ផ្ទះ Win Streak ដោយលទ្ធផល ៣សិតទល់នឹង១។

គួរបញ្ជាក់ថា ការប្រកួតទាំង៥លើករបស់វិសាខា គឺឈ្នះ៤ និងចាញ់១ ក្នុងនោះ ឈ្នះក្រុម Australian Volleyball Academy ៣-០, ឈ្នះក្រុម Saitama Azalea ៣-១ និងចាញ់ Win Streak ២-៣។ នៅវគ្គពាក់កណ្តាលផ្តាច់ព្រ័ត្រ វិសាខា បានយកឈ្នះក្រុម Flying Falcon ដោយពិន្ទុ ៣-០ និងវគ្គផ្តាច់ព្រ័ត្រសងសឹកម្ចាស់ផ្ទះ ៣-១ គ្រងជើងឯក Win+ Streak Volleyball Invitational Tournament៕