យោធាអាមេរិកបានទម្លាក់ជំនួយស្បៀងអាហារពីលើអាកាសលើកដំបូងរបស់ខ្លួន ចូលទៅក្នុងតំបន់ហ្គាហ្សា ក្នុងគោលបំណងកាត់បន្ថយការខ្វះខាតស្បៀងអាហារ ដែលកំពុងកាន់តែអាក្រក់ទៅ។
ទីបញ្ជាការកណ្តាលរបស់សហរដ្ឋអាមេរិក និង មន្ត្រីជាន់ខ្ពស់នៃរដ្ឋបាល លោក ចូ ប៉ៃឌិន និយាយថា យោធារបស់សហរដ្ឋអាមេរិក និង ប្រទេសហ្ស៊កដានីបានទម្លាក់អីវ៉ាន់ ដែលមានផ្ទុកអាហារចូលទៅក្នុងតំបន់ហ្គាហ្សាកាលពីថ្ងៃសៅរ៍ម្សិលមិញ។
ពួកគេនិយាយថា ប្រតិបត្តិការរួមបញ្ចូលគ្នានេះ ពាក់ព័ន្ធនឹងយន្តហោះដឹកជញ្ជូន C-130 ដែលទម្លាក់អាហារជាង៣៨,០០០ នៅតាមបណ្តោយឆ្នេរសមុទ្រមេឌីទែរ៉ាណេ។
នេះជាការផ្តល់ជំនួយសង្គ្រោះតាមផ្លូវអាកាសលើកដំបូងដោយរដ្ឋាភិបាលសហរដ្ឋអាមេរិក ចាប់តាំងពីជម្លោះចាប់ផ្តើមរវាងអ៊ីស្រាអែល និង ក្រុមហាម៉ាសប៉ាឡេស្ទីន។
បញ្ជាការដ្ឋានកណ្តាលនិយាយថា ខ្លួនកំពុងរៀបចំផែនការបេសកកម្មបញ្ជូនបន្តដែលមានសក្តានុពល។ រដ្ឋបាល លោក ចូ ប៉ៃឌិន ក៏ត្រូវបានគេរាយការណ៍ថា កំពុងពិចារណាលើជំនួយដឹកជញ្ជូនតាមសមុទ្រផងដែរ។
ក្បួនរថយន្តដឹកជំនួយត្រូវបានអនុញ្ញាតឱ្យឆ្លងកាត់តែច្រកត្រួតពិនិត្យចំនួនពីរប៉ុណ្ណោះនៅភាគខាងត្បូងនៃតំបន់ហ្គាហ្សា។ នោះធ្វើឱ្យអីវ៉ាន់មានការពិបាកទៅដល់តំបន់ភាគខាងជើង ដែលត្រូវបានគេនិយាយថា ជិតដល់គ្រោះទុរ្ភិក្ស។
ប្រធានាធិបតីសហរដ្ឋអាមេរិក លោក ចូ ប៉ៃឌិន បានប្រកាសកាលពីថ្ងៃសុក្រអំពីផែនការក្នុងការបញ្ជូនជំនួយតាមផ្លូវអាការទៅកាន់តំបន់ហ្គាហ្សា នៅប៉ុន្មានថ្ងៃខាងមុខ។
លោកបានបន្តថា ប្រជាជនមានការអស់សង្ឃឹមខ្លាំងណាស់ ដែលប្រជាជនស្លូតត្រង់ត្រូវបានជាប់ក្នុងសង្គ្រាមដ៏អាក្រក់មួយនេះ មិនអាចចិញ្ចឹមបីបាច់ថែរក្សាគ្រួសាររបស់ពួគេបាន។
រដ្ឋបាល លោក ចូ ប៉ៃឌិន ត្រូវបានរងការរិះគន់ចំពោះការបន្តផ្តល់ជំនួយយោធាដល់អ៊ីស្រាអែល ចំពេលមានវិបត្តិមនុស្សធម៌នៅក្នុងតំបន់ហ្គាហ្សា។ ការទម្លាក់ស្បៀងអាហារតាមផ្លូវអាកាសលើកដំបូង ត្រូវបានគេមើលឃើញថា ជាការប៉ុនប៉ងដើម្បីឆ្លើយតបនឹងការរិះគន់នេះ។
វីដេអូដែលត្រូវបានថតដោយបុគ្គលិកកាមេរ៉ារបស់ទូរស្សន៍ NHK ពីការិយាល័យនៅក្នុងតំបន់ហ្គាហ្សា បង្ហាញពីចំនួនយន្តហោះដឹកជញ្ជូនធំៗជាច្រើន បានទម្លាក់អ្វីដែលហាក់ដូចជាការផ្គត់ផ្គង់ជំនួយដោយឆ័ត្រយោងលើតំបន់ឆ្នេរ។ ក្រុមនាវិកបានថតវីដេអូនៅក្នុងទីក្រុង Rafah ភាគខាងត្បូងនៅម៉ោងប្រហែល៤រសៀល ថ្ងៃសៅរ៍ ម៉ោងក្នុងស្រុក។
អ្នកស្រុកនៅតំបន់ហ្គាហ្សានិយាយថា ពួកគេពេញចិត្តចំពោះការផ្គត់ផ្គង់ដែលបានទម្លាក់ពីលើអាកាស ប៉ុន្តែមានមនុស្សជាច្រើនក៏កំពុងអំពាវនាវឱ្យមានការកើនឡើងនៃការចែកចាយតាមរថយន្ត ដែលនឹងធានាបាននូវការផ្គត់ផ្គង់អីវ៉ាន់ឋិតថេរ៕
ប្រភព៖ NHK, ថ្ងៃអាទិត្យ ទី០៣ ខែមីនា ឆ្នាំ២០២៤
