ពានរង្វាន់ជើងឯកអាមេរិកអាទីន ឬ Copa América 2024 ដែលសហរដ្ឋអាមេរិក ទទួលរៀបចំធ្វើជាម្ចាស់ផ្ទះបានរកឃើញក្រុមខ្លាំងទាំង៤ ឡើងទៅកាន់វគ្គពាក់កណ្ដាលផ្ដាច់ព្រ័ត្រហើយ ខណៈម្ចាស់ការពារដំណែងជើងឯកអាហ្សង់ទីន ក៏បានឡើងមកកាន់វគ្គនេះដូចគ្នា។
ក្រុមទាំង៤ ដែលឡើងទៅកាន់វគ្គពាក់កណ្ដាលផ្ដាច់ព្រ័ត្រ Copa América 2024 មានដូចជា ក្រុមជម្រើសជាតិអាហ្សង់ទីន កាណាដា អ៊ុយរូហ្គាយ និងកូឡុំប៊ី។ មុនមកដល់វគ្គនេះ អាហ្សង់ទីន បានយកឈ្នះ អេក្វាឌ័រ ខណៈ កាណាដា ឈ្នះ វ៉េណេស៊ុយអេឡា ចំណែក កូឡុំប៊ី យកឈ្នះ បាណាម៉ា ស្របពេលដែល អ៊ុយរូហ្គាយ យកឈ្នះជើងខ្លាំងប្រេស៊ីល។
ក្នុងវគ្គពាក់កណ្ដាលផ្ដាច់ព្រ័ត្រនេះ ក្រុមជម្រើសជាតិអាហ្សង់ទីន ក្នុងនាមជាម្ចាស់ការពារដំណែងជើងឯក ត្រូវប៉ះជាមួយ ក្រុមជម្រើសជាតិកាណាដា នៅថ្ងៃទី១០ ខែកក្កដា ឆ្នាំ២០២៤ វេលាម៉ោង ៧៖០០នាទីព្រឹក ខណៈ កូឡុំប៊ី ប៉ះ អ៊ុយរូហ្គាយ នៅថ្ងៃទី១១ ខែកក្កដា ឆ្នាំ២០២៤ វេលាម៉ោង ៧៖០០នាទីព្រឹក។
គួរបញ្ជាក់ថា ពានរង្វាន់ប្រចាំទ្វីបអាមេរិកខាងត្បូង Copa América ដែលសហរដ្ឋអាមេរិក ទទួលរៀបចំធ្វើជាម្ចាស់ផ្ទះ បានចាប់ផ្តើមដំណើរការតាំងពីថ្ងៃទី២១ ខែមិថុនា ដល់ថ្ងៃទី១៤ ខែកក្តដា ឆ្នាំ២០២៤។ ប្រទេសអាហ្សង់ទីន និងអ៊ុយរូហ្គាយ ឈ្នះពានរង្វាន់នេះច្រើនជាងគេសរុប ១៥លើកដូចគ្នា ចំណែកឯប្រេស៊ីល ឈ្នះ៩លើក៕
