ទើបតែបានបញ្ចេញម៉ូដេលដំបូងរបស់ខ្លួននូវបច្ចេកវិទ្យាកាសស្តាប់ និងវែនតាឆ្លាតវ៉ៃ VR Headset មិនទាន់បានប៉ុន្មានផង ក្រុមហ៊ុន Apple បានសម្រេចចិត្តថានឹងផ្អាកធ្វើការទៅលើម៉ូដេលជំនាន់ថ្មីបណ្តោះអាសន្នសិន។
របាយការណ៍ដែលចេញផ្សាយកាលពីថ្ងៃអង្គារសប្តាហ៍នេះបានអះអាងថា ក្រុមហ៊ុនបានសម្រេចចិត្តផ្អាកការងារអភិវឌ្ឍ និងផលិតម៉ូដេលជំនាន់ថ្មី Vision Pro នៃ VR Headset ទោះបីជាកន្លងមកធ្លាប់បានបញ្ជាក់ថានឹងបង្ហាញផលិតផលថ្មីនេះនៅក្នុងឆ្នាំ២០២៤នេះក្តី។
ទោះបីជាយ៉ាងណាក្តី Apple នឹងព្យាយាមក្នុងការដាក់បង្ហាញ និងលក់ម៉ូដេលដែលមានតម្លៃធូរថ្លៃផ្សេងវិញនៅក្នុងឆ្នាំនេះដែលពួកវានឹងមានមុខងារតិចតួចបំផុតសម្រាប់អ្នកប្រើប្រាស់។កន្លងមក Apple មានផែនការក្នុងការបំបែកម៉ូដេល Headset ដែលប្រើប្រាស់បច្ចុប្បន្នទៅជា២ម៉ូដេលផ្សេងគ្នា។
គួរឲ្យដឹងដែរថា Apple មានបំណងក្នុងការដាក់បង្ហាញ និងលក់ VR Headset ម៉ូដេល Vision Pro នៅក្នុងប្រទេសគោលដៅចំនួន៨ដែលក្នុងនោះរួមមានទាំងចិន និងជប៉ុនផងក្នុងតម្លៃទីផ្សារប្រមាណជា៣៥០០ដុល្លារក្នុងមួយគ្រឿង ប៉ុន្តែគេសង្កេតឃើញថានដោយសារតែផលិតផលបច្ចុប្បន្នហាក់ដូចជាមិនសូវទទួលបានជោគជ័យ និងមានតំរូវការខ្លាំងដូចការរំពឹងទុកឡើយ។ ការណ៍នេះ អាចជាកត្តាដែល Apple កាត់បន្ថយការងារទៅលើការអភិវឌ្ឍ និងការផលិតម៉ូដេលក្រោយ ហើយគិតមកដល់ពេលនេះក្រុមហ៊ុន Apple មិនបានធ្វើការឆ្លើយតបលំអិតអំពីព័ត៌មាននេះទេទោះជាមួយនឹងសារព័ត៌មានណាក៏ដោយ៕
