(បាល់ទាត់)៖ នៅថ្ងៃច័ន្ទ ទី៣ ខែមិថុនា ឆ្នាំ២០២៤ម្សិលមិញសនេះ អ្នកចាត់ការថ្មីក្រុម FC Bayern Munich លោក Vincent Kompany ត្រូវបានគេរាយការណ៍មកថា កំពុងចាប់អារម្មណ៍លើខ្សែការពាររបស់ក្រុមកាំភ្លើងធំ Arsenal កីឡាករ Oleksandr Zinchenko។
បើយោងទៅតាមកាសែត The Mirror បានរាយការណ៍ថា លោក Vincent Kompany ត្រៀមចំណាយលុយជាង ៣៥លានផោន ទិញយកខ្សែការពារសញ្ជាតិអ៊ុយក្រែន Oleksandr Zinchenko របស់ក្រុមកាំភ្លើងធំ។
មែនទែនទៅ ការចង់បាន Zinchenko នេះបានកើតឡើង ដោយសារភាពមិនច្បាស់លាស់ជុំវិញអនាគតរបស់ខ្សែការពារឆ្វេង Alphonso Davies ខណៈកីឡាករអន្តរជាតិកាណាដារូបនេះ បានបដិសេធមិនចុះហត្ថលេខាលើកិច្ចសន្យាថ្មី ស្របពេលដែលមានពាក្យចចាមរាមថា ក្លិបអធិរាជស Real Madrid ចាប់អារម្មណ៍យ៉ាងខ្លាំងលើកីឡាករកំពូលល្បឿនរូបនេះ។
គួរឲ្យដឹងថា បន្ទាប់ពីបរាជ័យក្នុងការបញ្ចុះបញ្ចូល លោក Thomas Tuchel ឲ្យស្នាក់នៅបន្តក្នុងទឹកដីអាល្លឺម៉ង់ នៅទីបំផុត Bayern Munich បានសម្រេចចិត្តដ៏គួរឲ្យភ្ញាក់ផ្អើលមួយ ដោយតែងតាំង លោក Vincent Kompany ជាគ្រូបង្វឹកថ្មី។
ការសម្រេចចិត្តតែងតាំងបុរសវ័យ ៣៨ឆ្នាំរូបនេះ ហាក់មានភាពចម្រូងចម្រាស់មួយចំនួន ស្របពេលដែលអ្នកគាំទ្រហាក់មិនពេញចិត្តនឹងការសម្រេចចិត្តនោះទេ ដោយសារការខ្វះខាតបទពិសោធន៍របស់គាត់ ហើយលោកបានដឹកនាំ Burnley ធ្លាក់ចេញពី Premier League ទៀតផង ក្នុងរដូវកាលនេះ៕
