ទីបំផុត! Kylian Mbappé ចូលរួមជាមួយ Real Madrid ជាផ្លូវការ

(បាល់ទាត់)៖ កាលពីយប់ថ្ងៃច័ន្ទ ទី៣ ខែមិថុនា ឆ្នាំ២០២៤ ម្សិលមិញនេះ ក្លិបស្ដេចស Real Madrid បានប្រកាសពីការចុះហត្ថលេខាលើតារាឆ្នើមរបស់បារាំង Kylian Mbappé ក្នុងកិច្ចសន្យារយៈពេល ៥ឆ្នាំ ដោយបញ្ចប់ការផ្ទេរដ៏យូរអង្វែងបំផុតមួយនៅក្នុងបាល់ទាត់។

ការផ្លាស់ប្តូររបស់ Mbappé ពីក្លិប Paris Saint-Germain កើតឡើងពីរថ្ងៃ បន្ទាប់ពី Real Madrid បានឈ្នះពានរង្វាន់ UCL លើកទី១៥ ក្រោយបំបាក់ក្រុមខ្លាំងអាល្លឺម៉ង់ Borussia Dortmund មិនឲ្យតដៃរួចក្នុងលទ្ធផល ២ទល់នឹង០។

ក្លិប Real Madrid បានប្រកាសក្នុងសេចក្ដីថ្លែងការថា៖« Real Madrid CF និង Kylian Mbappé បានឈានដល់កិច្ចព្រមព្រៀងមួយ ដែលគាត់នឹងក្លាយជាកីឡាកររបស់ Real Madrid សម្រាប់ ៥រដូវកាលបន្ទាប់»។

ជាមួយគ្នានេះ Mbappé បានសរសេរនៅលើប្រព័ន្ធផ្សព្វផ្សាយសង្គមភ្លាមៗ បន្ទាប់ពីការប្រកាសនេះជាមួយរូបថតខ្លួនកាលពីក្មេងជាមួយ Ronaldo ថា៖«សុបិនក្លាយជាការពិត។ខ្ញុំពិតជារីករាយ និងមានមោទនភាពណាស់ ដែលបានចូលរួមជាមួយក្លឹបក្នុងក្តីស្រមៃរបស់ខ្ញុំ។ ខ្ញុំមានមោទនភាពក្នុងការចូលរួមជាមួយ Real Madrid”។

Mbappé បានបន្តថា៖« “គ្មាននរណាម្នាក់ អាចយល់ថា ខ្ញុំរំភើបចិត្តខ្លាំងប៉ុណ្ណានោះទេក្នុងពេលនេះ។ ខ្ញុំអាចរង់ចាំជួបអ្នកទាំងអស់គ្នានៅក្លិបនេះ ហើយអរគុណសម្រាប់ការគាំទ្រមិនគួរឱ្យជឿរបស់អ្នក! ខ្ញុំសូមនិយាយថា៖ 𝐡𝐚𝐥𝐚 𝐌𝐚𝐝𝐫𝐢𝐝!»។

គួរបញ្ជាក់ថា Mbappé មានទំនាក់ទំនងជាយូរមកហើយជាមួយនឹងការផ្លាស់ទៅ Madrid សូម្បីតែមុនពេលដែលគាត់បានចុះកិច្ចសន្យាបន្តរយៈពេលពីរឆ្នាំ ជាមួយ PSG នៅឆ្នាំ ២០២២ ។ កីឡាករវ័យ២៥ឆ្នាំរូបនេះ បានលេងច្រើនជាង ៣០០ប្រកួត សម្រាប់ក្លឹប ដោយស៊ុតបញ្ចូលទីសរុប ២៥០គ្រាប់ និងបានឈ្នះជើងឯកលីក ចំនួន ៦ដង។

គួររម្លឹកថា Mbappé បានចូលរួមជាមួយ PSG ពី Monaco ក្នុងតម្លៃខ្លួន ២១៤លានដុល្លារ ក្នុងឆ្នាំ ២០១៧ ដែលធ្វើឱ្យរូបគេក្លាយជាកីឡាករមានតម្លៃខ្លួនផ្ទេរថ្លៃបំផុតទីពីរនៅលើពិភពលោក បន្ទាប់ពី Neymar Jr៕