មន្ទីរបញ្ចកោណ៖ សហរដ្ឋអាមេរិកអនុញ្ញាតឱ្យទីក្រុងគៀវ ប្រើអាវុធរបស់ខ្លួនប្រឆាំងនឹងគោលដៅនៅក្នុងប្រទេសរុស្ស៊ី សម្រាប់ការបាញ់តបត 

មន្ត្រីក្រសួងការពារជាតិសហរដ្ឋអាមេរិកម្នាក់ បានបញ្ជាក់ប្រាប់ទីភ្នាក់ងារសារព័ត៌មានរុស្ស៊ី TASS ថា រដ្ឋបាលរបស់ប្រធានាធិបតីសហរដ្ឋអាមេរិក លោក ចូ ប៉ៃឌិន បានអនុញ្ញាតឱ្យប្រទេសអ៊ុយក្រែន ប្រើប្រាស់អាវុធអាមេរិក ប្រឆាំងនឹងគោលដៅនៅលើដីប្រទេសរុស្ស៊ី ក្នុងអំឡុងពេលសង្គ្រាមប្រឆាំងតប។

ឆ្លើយតបទៅនឹងសំណួររបស់ទីភ្នាក់ងារសារព័ត៌មានរុស្ស៊ី TASS មន្ត្រីរូបនេះ បាននិយាយថា ថ្មីៗនេះ ប្រធានាធិបតីបានណែនាំក្រុមការងាររបស់លោក ឱ្យធានាថា ប្រទេសអ៊ុយក្រែនអាចប្រើប្រាស់អាវុធ ដែលផ្គត់ផ្គង់ដោយសហរដ្ឋអាមេរិក ក្នុងគោលបំណងដើម្បីប្រឆាំងការបាញ់ប្រហារតបនៅក្នុងតំបន់ Kharkov រហូតទាល់តែប្រទេសអ៊ុយក្រែនអាចវាយបកប្រឆាំងនឹងកងកម្លាំងរុស្ស៊ី ដែលកំពុងវាយប្រហារពួកគេ ឬ រៀបចំវាយប្រហារពួកគេ។

លោកបានបន្ថែមថា គោលនយោបាយរបស់យើងទាក់ទងនឹងការហាមឃាត់ការប្រើប្រាស់អាវុធ ATACMS ឬ ការវាយប្រហាររយៈចម្ងាយឆ្ងាយនៅក្នុងប្រទេសរុស្ស៊ី មិនបានផ្លាស់ប្តូរនោះទេ។

កាសែត Politico បានរាយការណ៍កាលពីថ្ងៃព្រហស្បតិ៍ ដោយដកស្រង់សម្តីបុគ្គល ដែលមិនបញ្ចេញឈ្មោះចំនួនបួននាក់ រួមទាំងមន្ត្រីអាមេរិកពីរនាក់ផងថា ប្រធានាធិបតីសហរដ្ឋអាមេរិក លោក ចូ ប៉ៃឌិន បានផ្តល់ការអនុញ្ញាតសម្ងាត់ដល់រដ្ឋាភិបាលក្រុងគៀវ ក្នុងការប្រើប្រាស់អាវុធ ដែលផ្គត់ផ្គង់ដោយសហរដ្ឋអាមេរិក សម្រាប់វាយប្រហារគោលដៅនៅក្នុងទឹកដីរុស្ស៊ី។ យោងតាមរបាយការណ៍ ការអនុញ្ញាតនេះ អនុវត្តចំពោះតែតំបន់រុស្ស៊ី ដែលមានព្រំប្រទល់ជាប់តំបន់ Kharkov ភាគឦសាននៃប្រទេសអ៊ុយក្រែនតែប៉ុនណ្ណោះ។

នៅក្នុងបទសម្ភាសន៍មួយជាមួយនឹងកាសែត the Economist អគ្គលេខាធិការអង្គការណាតូ លោក Jens Stoltenberg បានស្នើឱ្យ សម្ព័ន្ធមិត្តណាតូគួរតែពិចារណាឡើងវិញ ថាតើប្រទេសអ៊ុយក្រែនអាចប្រើប្រាស់អាវុធ ដែលផ្គត់ផ្គង់ដោយប្រទេសលោកខាងលិច ដើម្បីធ្វើការវាយប្រហារលើមូលដ្ឋានយោធានៅក្នុងព្រំដែន ដែលទទួលស្គាល់ជាអន្តរជាតិរបស់រុស្ស៊ីដែរឬទេ។ ទោះជាយ៉ាងណាក៏ដោយ លោក Stoltenberg បាននិយាយនៅក្នុងសម័យប្រជុំនៃសភាណាតូថា មិនគួរមានកងទ័ពណាតូនៅលើដីក្នុងប្រទេសអ៊ុយក្រែននោះទេ ពីព្រោះបើមិនដូច្នេះទេ វានឹងពិបាកក្នុងការរក្សាប្លុកចេញពីជម្លោះនេះណាស់។

ទន្ទឹមនឹងនេះផងដែរ កាសែត The New York Times បានរាយការណ៍ដោយដកស្រង់ប្រភពរបស់ខ្លួនថា បន្ទាប់ពីដំណើរទស្សនកិច្ចថ្មីៗនេះរបស់លោកទៅកាន់ទីក្រុងគៀវ រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយថា លោកមានគម្រោងស្នើឱ្យប្រធានាធិបតី លោក ចូ ប៉ៃឌិន លុបចោលការហាមឃាត់ការប្រើប្រាស់អាវុធសហរដ្ឋអាមេរិកប្រឆាំងនឹងគោលដៅនៅក្នុងប្រទេសរុស្ស៊ី។

កាលពីថ្ងៃទី២៨ ខែឧសភា ប្រធានាធិបតីរុស្ស៊ី លោក វ៉្លាឌីមៀរ ពូទីន បាននិយាយថា នៅពេលនិយាយអំពីការវាយប្រហារនៅក្នុងប្រទេសរុស្ស៊ី តំណាងប្រទេសណាតូ គួរតែដឹងពីអ្វីដែលពួកគេកំពុងលេងជាមួយ។ បើ​តាម​ លោក​ពូទីន ប្រទេសរុស្ស៊ី​កំពុង​តាម​ដាន​ការ​ពិភាក្សា​បែប​នេះយ៉ាងយកចិត្តទុកដាក់។ លោកពូទីនបាននិយាយថា នៅពេលដែលយោធាអ៊ុយក្រែនប្រើប្រាស់អាវុធរយៈចម្ងាយឆ្ងាយ ទីក្រុងមូស្គូនឹងត្រូវសម្រេចចិត្តម្តងទៀតអំពីតំបន់អនាម័យ៕ ប្រភព៖ TASS