រដ្ឋាភិបាលជំរុញការធ្វើកសិកម្មបន្ថែម ដើម្បីផ្គត់ផ្គង់តម្រូវការក្នុងស្រុក

នាថ្ងៃទី ១ ខែកក្កដា ឆ្នាំ២០២៤នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបាន​អញ្ជើញជា​អធិបតី​ប្រារព្ធពិធីអបអរសាទរទិវាមច្ឆជាតិ លើកទី១៩ ព្រមទាំងលែងត្រី ១,៥លានក្បាល ចូលទៅក្នុងបឹងធំ ដែលជាបឹងធម្មជាតិដ៏ធំ ស្ថិតក្នុងភូមិកំពង់សំណាញ់ ឃុំមៀន ស្រុកព្រៃឈរ ខេត្តកំពង់ចាម។

នៅក្នុងឱកាសនេះ​ សម្ដេចធិបតីបានថ្លែងជំរុញឱ្យប្រជាកសិករ ខិតខំពង្រឹង និងពង្រីកការធ្វើកសិកម្ម បន្ថែមទៀត ដើម្បីធ្វើយ៉ាងណាធានាការផ្គត់ផ្គង់ក្នុងស្រុកឱ្យគ្រប់គ្រាន់ មុននឹងនាំចេញទៅទីផ្សារខាង ក្រៅ។
ការជំរុញរបស់រដ្ឋាភិបាលបែបនេះ គឺដើម្បីឆ្លើយតបទៅនឹងការកើនឡើងយ៉ាងឆាប់រហ័សនៃចំនួន ប្រជាជន។ បើតាមប្រសាសន៍របស់សម្ដេច កំណើននៃប្រជាជននឹងធ្វើឱ្យផ្ទៃដីកសិកម្មថយចុះ ជំនួសមកវិញនូវការកើនឡើងនៃវិស័យឧស្សាហកម្ម។

ក្នុងឱកាសនោះ សម្ដេចបានមានប្រសាសន៍ផងដែរថា៖ «រដ្ឋាភិបាលនៅតែយកចិត្តទុកដាក់ទៅ​លើខេត្តកសិកម្ម មិនមែនតែតម្លៃផលិតផលទេ ទី១មានទីផ្សារ ទី២មានថវិកាដែល​នៅសល់ក្រោយ​ការចំណាយអស់។»
មិនត្រឹមតែប៉ុណ្ណោះ រដ្ឋាភិបាលអាណត្តិទី៧នេះប្ដេជ្ញាធ្វើការបន្តពីរដ្ឋាភិបាលអាណត្តមុនៗ ដើម្បីដាក់​ចេញនូវគោលនយោបាយបន្តបន្ទាប់ក្នុងការជួយដល់កសិករ របស់យើងនៅទូទាំងប្រទេស ក៏ដូចជា​ការវិនិយោគផ្សេងៗនៅក្នុងវិស័យកសិកម្ម​។

ជាក់ស្ដែងដូចជាការទាក់ទាញវិនិយោគិនពីក្រៅ​មកដើម្បីវិនិយោគលើការកែច្នៃគ្រាប់ស្វាយចន្ទី និងកៅស៊ូជាដើម។ ទាំងនេះមិនត្រឹមតែបានបង្កើតការងារជូនប្រជាពលរដ្ឋកម្ពុជា ប៉ុន្តែក៏បាន បន្ថែមតម្លៃ និងទីផ្សារជូនកសិផលក្នុងស្រុកឱ្យកាន់តែប្រសើរឡើងថែមទៀត។

ដោយឡែកចំពោះវិស័យវារីវប្បកម្មិវិញក៏ដូចគ្នា ដោយសម្ដេចធិបតី បានជំរុញឱ្យមានការចិញ្ចឹម ត្រីជាលក្ខណៈធម្មជាតិ ការលែងត្រីចូលទៅក្នុងទន្លេជាប្រចាំ ដើម្បីធានាការហូបចុករបស់ប្រជា ពលរដ្ឋ។
សម្ដេចបន្តគូសបញ្ជាក់ទៀតថា៖ «យើងជាប្រទេសកសិកម្ម ធ្វើយ៉ាងណាអាចធានាបាននូវ​សុវត្ថិភាពស្បៀង និងទំហំនៃការផ្គត់ផ្គង់ បើទោះបីជាចំនួនប្រជាជនមានការកើនឡើងក៏ដោយ»៕